សៀមរាប ៖ កម្លាំងសមត្ថកិច្ចនៃស្នងការដ្ឋាននគរបាលខេត្តបាត់ដំបង សហការណ៍ជាមួយកម្លាំងព្រហ្មទណ្ឌខេត្តសៀមរាប និងកម្លាំងអធិការដ្ឋាននគរបាលស្រុកក្រឡាញ់ នៅថ្ងៃទី១៨ ខែកញ្ញា ឆ្នាំ២០១៩ បានធ្វើការឃាត់ខ្លួនជនសង្ស័យម្នាក់ ឈ្មោះ ម៉េត ប្រឹមប្រិយ ភេទប្រុស អាយុ ៣៥ឆ្នាំ រស់នៅភូមិ អញ្ជាញ សង្កាត់អូរចារ ក្រុងបាត់ដំបង ខេត្តបាត់ដំបង តាមដីកាបង្គាប់អោយចាប់ខ្លួន ពីបទប៉ុនប៉ងធ្វើមនុស្សឃាតដោយចេតនា ។
ក្រោយពីធ្វើការឃាត់ខ្លួនជនសង្ស័យនៅស្រុកក្រឡាញ់រួច សមត្ថកិច្ចខេត្តសៀមរាបបានប្រគល់ជនសង្ស័យទៅកម្លាំងជំនាញ របស់ស្នងការដ្ឋាននគរបាលខេត្តបាត់ដំបងដើម្បីអនុវត្តតាមនីតិវិធី ។
សូមជម្រាបថា ជនសង្ស័យបានប្រព្រឹត្តបទល្មើស(ប៉ុនប៉ងធ្វើមនុស្សឃាតដោយចេតនា) នៅភូមិអញ្ចាញ សង្កាត់អូរចា ក្រុងបាត់ដំបង ខេត្តបាត់ដំបងកាលពីថ្ងៃទី១៨ ខែកក្កដា ឆ្នាំ២០០៨ ។ នៅក្រោយពេលធ្វើសកម្មភាពរួច ជនល្មើសរូបនេះបានគេចខ្លួនបាត់រហូត ។ រហូតដល់ថ្ងៃទី១៥ ខែកញ្ញា ឆ្នាំ២០១៩នេះ ជនសង្ស័យបានធ្វើសកម្មភាពវាយតប់ប្រពន្ធរបស់ខ្លួន ហើយបានធ្លាយព័ត៌មានមកដល់នគរបាលខេត្តបាត់ដំបង ។ ទើបនគរបាលខេត្តបាត់ដំបង ក៏បានទំនាក់ទំនងទៅនគរបាលខេត្តសៀមរាប ស្រុកក្រឡាញ់ ឲ្យជួយធ្វើការស្រាវជ្រាវរកជននេះ ។ ក្រោយពេលធ្វើការស្រាវជ្រាវបានដឹងថា ជននោះកំពុងតែរស់នៅក្នុងភូមិ ឃុំចន្លាស់ដៃ ស្រុកក្រឡាញ់ពិតប្រាកដមែន ។ ដូច្នេះហើយកម្លាំងព្រហ្មទណ្ឌកម្រិតធ្ងន់ខេត្តបាត់ដំបង ក៏បានសុំការសហការជាមួយនឹងនគរបាលខេត្តសៀមរាប ស្រុកក្រឡាញ់ធ្វើការឃាត់ខ្លួនជននោះ តាមដីកាចាប់ខ្លួនរបស់តុលាការខេត្តបាត់ដំបងតែម្ដងដើម្បីយកមកផ្ដន្ទាទោសតាមផ្លូវច្បាប់ ៕
