ទីក្រុងហាណូយ,វៀតណាម ៖ ផ្សែងអ័ព្ទកំពុងគ្របដណ្ដប់លើរដ្ឋធានីហាណូយ របស់វៀតណាម អ្នកជំនាញនិយាយថា គុណភាពខ្យល់កខ្វក់នៅក្នុងទីក្រុងនេះ អាក្រក់ទៅៗក្នុងរយៈពេល០៣ថ្ងៃ ចុងក្រោយនេះ ហើយទំនងជាមិនមានភាពប្រសើរឡើងវិញទេ នៅប៉ុន្មានថ្ងៃខាងមុខទៀត នេះបើតាមសារព័ត៌មាន VnExpress ចុះផ្សាយនៅថ្ងៃទី១៨ កញ្ញា ២០១៩នេះ ។
សន្ទស្សន៍គុណភាពខ្យល់របស់ទីក្រុងហាណូយ ត្រូវបានកត់ត្រាឃើញថាស្ថិតនៅកម្រិត ១៣៦ កាលពីល្ងាចថ្ងៃទី១៧ ដោយស្ថានីយត្រួតពិនិត្យអាកាសចំនួន១១កន្លែង ដែលនៅជុំវិញទីក្រុងនេះ ហើយរហូតមកដល់ព្រឹកថ្ងៃទី១៨នេះ ទិន្នន័យបានមកពីស្ថានីយត្រួតពិនិត្យ៣ នៅក្នុងក្រុងហាណូយបង្ហាញថា ខ្យល់កខ្វក់ដែលមានឈ្មោះថា PM2.5 ឡើងដល់កម្រិត ១៥២ អាចនិយាយបានថា ទីក្រុងនេះ ក្លាយជាទីក្រុងដែលត្រូវបានបំពុលដោយខ្យល់កខ្វក់អាក្រក់បំផុតលំដាប់ទី៧ លើពិភពលោក ។
ស្ថានីយត្រួតពិនិត្យខ្យល់ បានព្យាករណ៍មុនថា គុណភាពខ្យល់អាក្រក់នៅតែមានអាចនឹងបន្តរហូតចុងសប្តាហ៍ ក្នុងរង្វង់ ១៧០ ។ ទោះជាយ៉ាងណា នៅត្រឹមចំណុចនេះ គឺទីក្រុងហាណូយ ប្រសើរជាង ទីក្រុងគុជិងរបស់ប្រទេសម៉ាឡេស៊ី ដែលកម្រិតជាតិពុល ឡើងដល់ ២២០ ឯណោះ ។
ដោយឡែកនៅឯកម្ពុជាវិញ ក្រសួងបរិស្ថានបានជូនដំណឹងដល់សាធារណជន អំពីស្ថានភាពគុណភាពខ្យល់ នៅក្នុងរាជធានីភ្នំពេញ កាលពីថ្ងៃទី១៦ ខែកញ្ញា ឆ្នាំ២០១៩ អោយដឹងថា ផ្អែកតាមលទ្ធផលត្រួតពិនិត្យបង្ហាញថា គុណភាពខ្យល់នៅក្នុងរាជធានីភ្នំពេញមានកម្រិតល្អប្រសើរ ជាងប្រទេសជិតខាង ។
សូមរម្លឹកថា កាលពីអំឡុងដើមឆ្នាំ ២០១៩ ទីក្រុងបាងកកត្រូវបានវាយប្រហារដោយផ្សែងអ័ព្ទពុល ដែលធ្វើឱ្យប្រជាជនមួយចំនួនក្អក និងកណ្តាស់ ដែលសូម្បីតែសត្វចិញ្ចឹម ក៏ទទួលរងជំងឺ បណ្តាលមកពីផ្សែងអ័ព្ទទាំងនេះផងដែរ ។
PM2.5 គឺជាភាគល្អិតនិចលតូចៗនៅក្នុងខ្យល់ ដែលមានអង្កត់ផ្ចិតតូចជាង២,៥មីក្រុង។ ភាគល្អិតនេះមានប្រភពមកពីការដុតឥន្ធនៈផូស៊ីល និងកម្ទេចធូលីផ្សេងៗទៀត ហើយភាគល្អិតនេះអាចស្រូបចូលទៅដល់សួត និងពេលខ្លះដល់សរសៃឈាម ដែលអាចបង្កការប៉ះពាល់ដល់សុខភាពមនុស្ស ប្រសិនបើការស្រូបចូលលើសកម្រិត ៕