រាជធានីភ្នំពេញ ៖ កម្លាំងគណៈបញ្ជាការឯកភាពខណ្ឌមានជ័យ បានចុះប្រតិបត្តិការបង្ក្រាបគ្រឿងញៀនទ្រង់ទ្រាយធំ នៅតំបន់ភ្នំសំរាម ដែលហៅថាទីលានចាក់សំរាមចាស់ ក្នុងនោះឃាត់ខ្លួនមនុស្សប្រុសស្រីចំនួន២៥នាក់ ព្រមទាំងដកហូតថ្នាំញៀន២១កញ្ចប់ និងឧបករណ៍ប្រើប្រាស់មួយចំនួន ស្ថិតនៅក្នុងភ្នំសំរាម ភូមិដំណាក់ធំ សង្កាត់ស្ទឹងមានជ័យ២ ខណ្ឌមានជ័យ រាជធានីភ្នំពេញ ។
ប្រតិបត្តិការនេះធ្វើឡើងនៅព្រឹកថ្ងៃទី១៨ កញ្ញា ២០១៩នេះ ក្រោមការបញ្ជាផ្ទាល់ពីលោក ពេជ្រ កែវមុន្នី អភិបាលខណ្ឌមានជ័យ និងមានការឯកភាពពីលោក ស្រី ម៉ាកនី ព្រះរាជអាជ្ញារង ព្រមទាំងមានការចូលរួមពីលោក ម៉េង វិមានតារា អធិការខណ្ឌមានជ័យ និងលោកមេបញ្ជាការរង កងរាជអាវុហត្ថខណ្ឌ ។ ដោយកម្លាំងសមត្ថកិច្ចបានធ្វើការបែងចែកជា៤គោលដៅ និងឈានដល់ការឃាត់ខ្លួនមនុស្សប្រុសស្រី២៥នាក់ (មានស្រី៦នាក់) ព្រមទាំងដកហូតថ្នាំញៀន២១កញ្ចប់ ក្នុងនោះ២កញ្ចប់ធំ, ឧបករណ៍ប្រើប្រាស់គ្រឿងញៀនមួយចំនួន និងម៉ូតូ២គ្រឿង។
បច្ចុប្បន្នជនសង្ស័យទាំង ២៥នាក់ និងវត្ថុតាងទាំងអស់នេះ ត្រូវបញ្ជូនយកទៅកាន់អធិការនគរបាលខណ្ឌមានជ័យ ដើម្បីធ្វើការសាកសួរ និងចាត់ការតាមនីតិវិធីច្បាប់ ។ ចំពោះទីតាំងដែលក្រុមជនសង្ស័យទាំងនោះបានស្នាក់នៅនិងចែកចាយគ្រឿងញៀន ត្រូវកម្លាំងសមត្ថកិច្ចធ្វើការរុះរើសចេញផងដែរ ៕
