រាជធានីភ្នំពេញ ៖ ម្សិលមិញនេះមានករណីអគ្គិភ័យមួយ បានឆាបឆេះផ្ទះប្រជាពលរដ្ឋខ្មែរអ៊ិស្លាមជាច្រើនខ្នង នៅសង្កាត់ច្រាំងចំរេះទី២នោះ គិតមកត្រឹមព្រឹកថ្ងៃទី១៨ កញ្ញា នេះ ឪពុកម្តាយរបស់ក្មេងប្រុសរងគ្រោះ(ស្លាប់) កំពុងស្ថិតក្នុងស្ថានភាពសង្គ្រោះបន្ទាន់ នៅមន្ទីរពេទ្យកាល់ម៉ែត្រ នៅឡើយនោះទេ ពោលគឺមិនបានបាត់បង់ជីវិតទេ! ដោយបុរសរងគ្រោះគឺស្ថិតក្នុងសភាពធ្ងន់ធ្ងរ ជាងប្រពន្ធ ។
ហេតុការណ៍នេះ បានកើតឡើង នៅវេលាម៉ោង១២ថ្ងៃទី១៧ ខែកញ្ញា ឆ្នាំ២០១៩ នៅចំណុចភូមិឃ សង្កាត់ច្រាំងចំរេះ២ ខណ្ឌឫស្សីកែវ តាមបណ្ដោយផ្លូវជាតិលេខ៥ ។
សូមជម្រាបថា ឪពុករបស់ក្មេងប្រុស(ស្លាប់) នៅមានជីវិតនៅឡើយ ខណៈអគ្គិភ័យកំពុងឆេះនោះ រូបគាត់រងរបួសធ្ងន់ ដោយសារតែគាត់ព្យាយាមរត់ចូលទៅក្នុងផ្ទះ ដែលកំពុងតែឆាបឆេះនោះ ដើម្បីសង្គ្រោះកូនប្រុសរបស់គាត់ ប៉ុន្តែមិនអាចជួយយកបាន ដោយខ្លួនគាត់រងរបួសធ្ងន់ រួចក៏លោតចុះទៅទឹក បន្ទាប់មករូបគាត់ ស្ទុះឡើងពីមកវិញ ហើយរត់ចូលទៅក្នុងភ្លើងម្តងទៀត ដើម្បីសង្គ្រោះកូនប្រុសខ្លួន ប៉ុន្តែនៅតែមិនអាចសង្គ្រោះកូនប្រុសបានដដែល ។ ក្រោយកើតហេតុ ខណៈពេលបញ្ជូនឪពុកក្មេងប្រុសរងគ្រោះទៅកាន់មន្ទីរពេទ្យ គឺឪពុកក្មេងប្រុសរងគ្រោះគាំងបេះ ធ្វើឱ្យម្នាក់ៗ ស្មានតែស្លាប់ហើយ រហូតដល់អ្នកស្រុក និងប្រជាពលរដ្ឋនៅវត្ត នាំគ្នាជីករណ្តៅចំនួន២ ដើម្បីត្រៀមកប់សពជនរងគ្រោះឪពុកនិងកូនថែមទៀត ប៉ុន្តែក្រោយមកបុរសជាឪពុក បានដឹងខ្លួនឡើងវិញ ។
សូមរម្លឹកថា អគ្គិភ័យនៅច្រាំងចំរេះ២ ព្រឹកមិញ ជាស្នាដៃលោកកូន! ឆេះស្លាប់ប្អូន និងឪពុកខ្លួន
ពាក់ព័ន្ធនឹងគ្រោះអគ្គីភ័យនេះ អភិបាល នៃគណៈអភិបាលរាជធានីភ្នំពេញ លោកឃួង ស្រេង នារសៀលថ្ងៃទី១៧ កញ្ញានេះ បានអញ្ជើញទៅពិនិត្យមើលទីតាំងដែលរងគ្រោះអគ្គីភ័យ នៅសង្កាត់ច្រាំងចំរេះទី២ ខណ្ឌឫស្សីកែវ ហើយក្នុងឱកាសនោះ លោកអភិបាលបានចូលបុណ្យសព៥លានរៀល ដើម្បីជាការរំលែកទុក្ខផងដែរ ៕
