ខេត្តតាកែវ ៖ នាឱកាសបុណ្យភ្ជុំបិណ្ឌនេះ មន្ត្រីជំនាញសាខាកាំកុងត្រូលខេត្តតាកែវ បានចុះត្រួតពិនិត្យ មុខទំនិញនានា ដែលដាក់លក់នៅលើផ្សារតាកែវ នាព្រឹកថ្ងៃទី១៧ កញ្ញា ២០១៩នេះ ក្នុងនោះរកឃើញក្រុមហ៊ុនអំបិលមួយចំនួន២ ដែលក្រុមអាជីវករបានដាក់លក់ ដោយមិនមានដាក់សារធាតុ «អ៊ីយ៉ូដ»ក្នុងអំបិលទាំងអស់នោះទេ ។
លោក ប៉ោ លាងគង់ ប្រធានសាខាកាំកុងត្រូលខេត្តតាកែវ បានថ្លែងឲ្យដឹងថា មន្ត្រីជំនាញកាំកុងត្រូលគឺបានរកឃើញអំបិលដែលផលិតដោយក្រុមហ៊ុន២ គឺក្រុមហ៊ុន ទា គីមហួរ និងក្រុមហ៊ុន ឡូម៉ា មិនមានដាក់សារធាតុអ៊ីយ៉ូដ នៅក្នុងអំបិលទាំងនោះទេ ប៉ុន្តែការវេចខ្ចប់បែរជាដាក់អក្សរថា អំបិលអ៊ីយ៉ូដ នៅលើសម្បក់កញ្ចប់ ទៅវិញ ។
លោក ប៉ោ លាងគង់ បន្តថា សារធាតុ«អ៊ីយ៉ូដ»នេះវាមានសារៈសំខាន់ណាស់ ដល់ការរីកលូតលាស់រាងកាយ បញ្ញាស្មារតីរបស់កុមារ និងមនុស្សគ្រប់វ័យទាំងអស់ ។ ដូច្នោះមន្ត្រីជំនាញបានធ្វើការណែនាំដល់បងប្អូនអាជីវករដែលមានដាក់លក់អំបិលទាំង២ក្រុមហ៊ុនេះ ត្រូវតែទាក់ទងទៅក្រុមហ៊ុនទាំង២ ឲ្យមកនាំយកអំបិលដែលគ្មានសារធាតុអ៊ីយ៉ូដទាំងអស់នេះ យកត្រឡប់ទៅក្រុមហ៊ុនវិញ កុំយកអំបិលក្លែងបន្លំគុណភាព បែបនេះមកទៀត ព្រោះហាមឃាត់មិនឲ្យដាក់លក់នៅលើទីផ្សារទេ ។
លោកប្រធានសាខាបញ្ជាក់ថា ប្រសិនជាកន្លាំងរបស់លោកចុះពិនិត្យមើលលើកក្រោយ នៅតែរកឃើញក្រុមហ៊ុនទាំង២ខាងលើមិនព្រមកែប្រែនោះទេ គឺខាងជំនាញនឹងរឹបអូសអំបិលទាំងអស់ យកទៅកម្ទេចចោលតែម្ដង និងចាក់ការតាមនិតិវិធីច្បាប់មិនលើកលែងឡើយ ។
លោកក៏បានធ្វើការអំពាវនាវដល់បងប្អូនអាជីវករ ដែលដាកលក់ទំនិញនៅលើទីផ្សារទាំងអស់ ត្រូវតែលក់ទំនិញដែលគ្មានសារធាតុគីមី ដែលនាំឲ្យប៉ះពាល់សុខភាព បងប្អូនប្រជាពលរដ្ឋ ជាពិសេស អំបិលដែលគ្មានសារធាតុ«អ៊ីយ៉ូដ»នេះ វានឹងធ្វើឲ្យអ្នកប្រើប្រាស់ អាចកើតទៅជាពកករ និងមិនមានការរីកលូតលាស់ដល់បញ្ញា ស្មារតីរបស់មនុស្ស ជាពិសេសរូបរាងកាយរបស់កុមារ ៕