រាជធានីភ្នំពេញ ៖ ផ្ទះប្រជាពលរដ្ឋចំនួន១១ខ្នង ត្រូវបានអគ្គិភ័យឆាបឆេះ ក្រោមស្នាដៃរបស់យុវជនម្នាក់ ដែលសុំលុយឪពុកមិនបាន ក៏ដុតផ្ទះខ្លួនឯងចោល រាលដាលឆេះដល់ផ្ទះគេផ្សេងទៀតតែម្ដង ។ ប៉ុន្តែអ្វីជាអកុសលនោះ ក្នុងហេតុការណ៍នេះ បណ្ដាលឲ្យ ក្មេងប្រុសអាយុ១៣ឆ្នាំម្នាក់ ត្រូវជាប្អូន និងបុរសម្នាក់ទៀត ត្រូវជាឪពុករបស់ជនបង្ក បានស្លាប់។
ហេតុការណ៍នេះ បានកើតឡើង នៅវេលាម៉ោង១២ថ្ងៃទី១៧ ខែកញ្ញា ឆ្នាំ២០១៩ នៅចំណុចភូមិឃ សង្កាត់ច្រាំងចំរេះ២ ខណ្ឌឫស្សីកែវ តាមបណ្ដោយផ្លូវជាតិលេខ៥ ។
តាមប្រភពព័ត៌មានពីកន្លែងកើតហេតុ បានឲ្យដឹងជាបឋមថា មុនពេលកើតហេតុ គេបានឃើញជនសង្ស័យជាមនុស្សញៀនថ្នាំ បានសុំលុយឪពុករបស់ខ្លួន ដើម្បីយកទៅទិញថ្នាំ ប៉ុន្តែបុរសជាឪពុកមិនឲ្យនោះទេ ថែមទាំងស្តីបន្ទោសតិចតួចផងដែរ ស្រាប់តែ នៅពេលដែលពុំមាននរណាម្នាក់ចាប់អារម្មណ៍នោះ ជនសង្ស័យបានធ្វើសកម្មភាពដុតផ្ទះខ្លួនឯងចោល ខណៈដែលឪពុក និងប្អូនប្រុសនៅក្នុងផ្ទះ បណ្តាលឲ្យឆាបឆេះសន្ធោសន្ធៅ រួចភ្លើងបានបន្តឆាបឆេះរាលដាលដល់ផ្ទះ១១ខ្នងទៀត បណ្តាលឲ្យជនរងគ្រោះទាំង២នាក់ បានស្លាប់រួញក្រញ៉ង់ក្នុងភ្លើង ចំណែកជនសង្ស័យក្រោយពេលធ្វើសកម្មភាព បានរត់គេចខ្លួនបាត់ ។
អគ្គិភ័យនៅច្រាំងចំរេះ២ព្រឹកមិញ ជាស្នាដៃលោកកូន ឆេះស្លាប់ប្អូនប្រុសនិងឪពុកក្រោយមានហេតុការណ៍ភ្លើងឆាបឆេះកើតឡើង រថយន្តពន្លត់អគ្គិភ័យរបស់សាលាខណ្ឌឫស្សីកែវ ស្នងការរាជធានី រួមនឹងអាជ្ញាធរប៉ូលិសមូលដ្ឋានផងដែរ បានចេញទៅអន្តរាគមន៍បាញ់ទឹកពន្លត់ ដោយប្រើពេល១ម៉ោង ទើបរលត់ជាស្ថាពរ និងប្រើប្រាស់ឡានទឹកសរុបចំនួន២៧គ្រឿង ៕