រាជធានីភ្នំពេញ ៖ អគ្គនាយកដ្ឋានគយ និងរដ្ឋាករកម្ពុជា បានប្រកាសថា កាកសំណល់ប្លាស្ទីកចំនួន៦៩កុងទឺន័រទៀត សរុបគ្រប់ចំនួនទាំង៨៣ ត្រូវបានដឹកជញ្ជូនតាមកប៉ាល់ ត្រឡប់ទៅប្រទេសដើមវិញហើយ កាលពីថ្ងៃទី១៥ កញ្ញា ២០១៩ ដែលកាកសំណល់ប្លាស្ទីកទាំងនោះ ត្រូវបានលួចនាំចូលដោយខុសច្បាប់មកកម្ពុជា ដោយក្រុមហ៊ុន CHUNG YUEN PLASTIC MANUFACTORE Co., Ltd ។
សូមជម្រាបថា កាលពីយប់ថ្ងៃទី២០ ខែសីហា ឆ្នាំ២០១៩ ក្រុមហ៊ុនខាងលើនេះ បានដឹកជញ្ជូនសំណល់ទាំងនោះត្រឡប់ទៅវិញបណ្តើៗ បានចំនួន១៤កុងតឺន័រ ។ ក្រៅពីការដឹកជញ្ជូននេះ ក្រុមហ៊ុនមួយនេះ ក៏បានបង់ប្រាក់ពិន័យ ចូលថវិកាជាតិគ្រប់ចំនួន ព្រមទាំងបានបង់ថ្លៃចំណតផែ និងថ្លៃកប៉ាល់មួយចំនួនផងដែរ គិតចាប់ពីថ្ងៃទី២៣ ខែសីហា មក ។
សូមបញ្ជាក់ថា កាកសំណល់ប្លាស្ទីកចំនួន៨៣ទូរ កុងតឺន័រ មានទម្ងន់សរុបជិត១, ៦០០តោន ត្រូវបានសមត្ថកិច្ចកម្ពុជាបង្ក្រាបបាននៅផែព្រះសីហនុ កាលពីរសៀលថ្ងៃទី១៦ កក្កដា ២០១៩ ។ កាកសំណល់ទាំងនោះ មានប្រភពមកពីសហរដ្ឋអាមេរិក ចំនួន៧០កុងតឺន័រ មានទម្ងន់១,៣២២តោន និងប្រទេសកាណាដាចំនួន១៣កុងតឺន័រ មានទម្ងន់២៧០តោន ៕
