រាជធានីភ្នំពេញ ៖ មនុស្ស៦នាក់ ដែលជាអតីតសកម្មជននៃអតីតគណបក្សសង្គ្រោះជាតិ ដែលពាក់ព័ន្ធនឹងផែនការផ្តួលរំលំរាជរដ្ឋាភិបាលស្របច្បាប់របស់កម្ពុជា ត្រូវបានសមត្ថកិច្ចចាប់ខ្លួនជាបន្តបន្ទាប់ កាលពីចុងសប្តាហ៍មុននេះ ហើយក្នុងចំណោមនោះ មាន៣នាក់ ត្រូវតុលាការសម្រេចឃុំខ្លួនដាក់ពន្ធនាគារព្រៃស ជាបណ្តោះអាសន្ន ។
អ្នកនាំពាក្យអគ្គស្នងការដ្ឋាននគរបាលជាតិ លោកឧត្តមសេនីយ៍ឯក ឆាយ គឹមខឿន បានប្រាប់នៅព្រឹកថ្ងៃទី១៦ ខែកញ្ញានេះថា រហូតមមកដល់ពេលនេះ សមត្ថកិច្ចបានចាប់ខ្លួនមនុស្សចំនួន៦នាក់ ពាក់ព័ន្ធការធ្វើសកម្មភាពផ្សព្វផ្សាយផែនការ ត្រៀមលក្ខណៈប៉ុនប៉ងចង់ផ្តួលរំលំរាជរដ្ឋាភិបាលស្របច្បាប់ តាមរយៈការធ្វើបដិវត្តន៍ពណ៌ ការបង្កអសន្តិសុខបំពុលបរិយាកាសសង្គម ។
អ្នកនាំពាក្យ បានបញ្ជាក់យ៉ាងដូច្នេះថា “ការចាប់ខ្លួននេះ រហូតមកដល់ពេលនេះ មានមានចំនួន៦នាក់ហើយ គឺពាក់ព័ន្ធនឹងបុគ្គលដែលដើរផ្សព្វផ្សាយ ផែនការត្រៀមលក្ខណៈចង់ផ្តួលរំលំរាជរដ្ឋាភិបាល ។ ចង់មកដណ្តើមយកអំណាចតាមរយៈការធ្វើបដិវត្តន៍ពណ៌, តាមរយៈការរៀបចំផែនការបង្កអសន្តិសុខសង្គម ។ ហេតុនេះរដ្ឋាភិបាល និងកម្លាំងសមត្ថកិច្ច មិនអាចអនុញ្ញាតឲ្យគាត់មកបង្កព្យុះភ្លៀងនៅពេលដែលស្រុកទេស កំពុងមានសន្តិភាពនោះបានទេ អ៊ីចឹង ត្រូវតែបង្ក្រាបហើយ មិនថា អតីតសមាជិកគណបក្សប្រឆាំង ឬបុគ្គលណាក៏ដោយ ឲ្យតែបង្កអសន្តិសុខ ឲ្យតែមានផែនការប៉ុនប៉ងផ្តួលរំលំរាជរដ្ឋាភិបាល ត្រូវតែចាត់ការ” ។
ដោយឡែក បើយោងតាមសេចក្តីថ្លែងការណ៍មួយរបស់ក្រុមប្រឆាំង បានឱ្យដឹងថា សមត្ថកិច្ចបានធ្វើការឃាត់ខ្លួនសកម្មជនរបស់ខ្លួនចំនួន៦នាក់ដែលក្នុងនោះរួមមាន ទី១-លោក យ៉ាត ភារម្យ ទី២-លោក ទុំ ប៊ុនថន ទី៣-កញ្ញា យូ ចាន់ធានី ទី៤-លោក លី ម៉េងឃាង ទី៥-លោក លី លីន និង ទី៦-លោក ឈុន ថៃយុទ្ធ ក្នុងរយៈពេល២ថ្ងៃ កាលពីចុងសប្តាហ៍កន្លងទៅនេះ ។
អតីតសកម្មជន នៃអតីតគណបក្សសង្គ្រោះជាតិ០៣នាក់ ក្នុងចំណោមជនសង្ស័យ០៦នាក់ ត្រូវបញ្ជូនទៅឃុំខ្លួននៅពន្ធនាគារព្រៃស មានទី១ ឈ្មោះកញ្ញា យូ ចាន់ធានី ទី២ ឈ្មោះ ទុំ ប៊ុនថន និងទី៣ ឈ្មោះ យ៉ាត ភារម្យ ។ ចំណែកជន៣នាក់ផ្សេងទៀត កំពុងស្ថិតក្នុងដំណាក់កាលនីតិវិធីស៊ើបសួររបស់សមត្ថកិច្ចនៅឡើយ ៕