វាពិតជាពិបាកខ្លាំងណាស់ចំពោះអ្នកមានបញ្ហាពុលឡាន ឲ្យតែមានការគម្រោងធ្វើដំណើរ ទៅតាមទីឆ្ងាយម្ដង ដឹងតែមានអារម្មណ៏មិនស្រួល វេទនាក្នុងខ្លួន វិលមុខ ឈឺក្បាល ក្អួតចង្អោរ ហើយពេលខ្លះទៀតចង់ក្អួតក៏ក្អួតមិនចេញ អាការៈនេះអាចកើតមានឡើងមិនថាចាស់ មិនថាក្មេង។
អាការៈពុលឡានអាចមកពីសុខភាពយើងខ្សោយ ឬក៏យើងធ្វើសកម្មភាពមួយចំនួនពេលកំពុងធ្វើដំណើរ ទើបជំរុញឲ្យមានអារម្មណ៍ធីងធោង បែកញើស វិលមុខ ចេញទឹកមាត់ បង្កទៅជាពុលឡានតែម្តង។ ខាងក្រោមនេះជាតិចនិកសាមញ្ញមួយចំនួន ដែលអាចជួយបំបាត់អាការៈពុលឡាន៖
១- កុំញ៉ាំអាហារច្រើនពេក
មុនចាប់ផ្តើមចេញដំណើរ អ្នកដែលពុលឡានមិនត្រូវញ៉ាំអាហារ ឬនំចំណីច្រើនពេកនោះទេ ពិសេសពួកអាហារហឹរៗ ឬអាហារខ្លាញ់ច្រើនពេកទេ។
២-កុំអានសៀវភៅ ឬចុចទូរស័ព្ទ
ត្រូវចាំទុកបើយើងពុលឡាន មិនត្រូវអានសៀវភៅ ឬចុចទូរស័ព្ទពេលកំពុងជិះឡានឲ្យសោះ ត្រូវផ្ចង់អារម្មណ៍ មើលទៅមុខឲ្យបានច្រើន។
៣- អង្គុយនៅក្បែរបង្អួច ឬកន្លែងមិនអាប់អួរ
បរិយាកាសអាប់អួរ ពិសេសកន្លែងដែលបិទជិត មិនអាចមើលឃើញធម្មជាតិ ក៏ជាមូលហេតុនាំឲ្យយើងពុលឡានដែរ យកល្អគួរតែអង្គុយនៅកៅអីឡានខាងមុខ ឬក្បែរបង្អួច។
៤- ញ៉ាំស្ករហឹរៗ
ការញ៉ាំស្ករហឹរៗ ពិសេសពពួកស្ករគ្រាប់ដែលចម្រាញ់ចេញពីរុក្ខជាតិ ឬបន្លែ ដូចជាស្ករខ្ញី ក៏អាចជួយបំបាត់អាការៈពុលឡានបានដែរ។
៥- និយាយ ឬច្រៀងលេង
ពេលធ្វើដំណើរយើងត្រូវធ្វើចិត្តឲ្យសប្បាយរីករាយ ព្យាយាមនិយាយ ឬច្រៀងលេងឲ្យបានច្រើនជាមួយអ្នករួមដំណើរជាមួយ នោះអាការៈពុលឡានក៏កាត់បន្ថយទៅតាមនោះដែរ។
៦- ប្រើថ្នាំជំនួយ
បើដឹងថាខ្លួនយើងពុលឡាន មុននឹងចេញដំណើរយើងអាចទិញថ្នាំបំបាត់ពុលឡានដោយវេជ្ជបញ្ជាមកលេបបាន។ ជាទូទៅគ្រូពេទ្យតែងតែណែនាំឲ្យញ៉ាំថ្នាំនោះ ២០ ឬ៣០នាទី មុនចេញដំណើរ។
ដើម្បីឲ្យកាន់តែល្អបងប្អូនគួរតែត្រៀមនូវសម្ភារៈ ថ្នាំសង្កូវឲ្យបានរៀបរយ ចៀសវាងគ្មានរបស់ប្រើប្រាស់ ហើយគួរតែធ្វើលំហាត់ប្រាណដើម្បីឲ្យសុខភាពបានមាំមួនល្អ ៕
