ខេត្តបាត់ដំបង ៖ សំណាងល្អណាស់! ដែលស្ត្រីមានផ្ទៃពោះគ្រប់ខែម្នាក់បានឈឺពោះសម្រាល ទើបក្រុមគ្រួសារប្រញាប់ដឹកបញ្ជូនតាមម៉ូតូសំដៅទៅកាន់មណ្ឌលសុខភាព ស្រាប់តែធ្វើដំណើរបានពាក់កណ្តាលផ្លូវ ទ្រាំលែងបានក៏ឈប់ម៉ូតូអែបខាង ហៅគេឯងឱ្យជួយ ត្រូវបានអ្នកគ្រូពេទ្យម្នាក់ មកជួយសម្រាលបានកូនប្រុសម្នាក់ ប្រកបដោយសុវត្ថិភាព ។
ហេតុការណ៍ដ៏ភ្ញាក់ផ្អើលខាងលើនេះ បានកើតឡើងកាលពីថ្ងៃទី១១ ខែកញ្ញា ឆ្នាំ ២០១៩ នៅតាមបណ្តោយផ្លូវជាតិលេខ៦ ត្រង់ចំណុចភូមិឈូក ឃុំបាសាក់ ស្រុករុក្ខគិរី ។
ស្ត្រីដែលសម្រាលកូនតាមផ្លូវរូបនេះ មានឈ្មោះយឹម សុឃេន អាយុ៣៨ឆ្នាំ មានប្តីឈ្មោះ អុល (បានរត់ចោលប្រពន្ធ) និងមានលំនៅ ក្នុង ភូមិអូររំចេក ឃុំបាសាក់ ស្រុករុក្ខគិរី ។
តាមប្រភពពីសាច់ញាតិរបស់ស្ត្រីអភ័ព្វខាងលើ បានរៀបរាប់ប្រាប់ថា ស្ត្រីរូបនេះមានវាសនាអភ័ព្វខ្លាំងណាស់ ត្រូវប្តីចុះចោលបាត់តាំងពីនាងទើបនឹងមានផ្ទៃពោះ៤ខែ មកម្ល៉េះ ធ្វើឱ្យនាងត្រូវពពោះ ខំធ្វើការរកលុយ តែម្នាក់ឯង រហូតដល់ថ្ងៃសម្រាលនេះ ។
ប្រភពបានបន្តថា នៅមុនពេលកើតហេតុ ស្ត្រីរងគ្រោះបានប្រាប់សាច់ញាតិថា នាងឈឺពោះខ្លាំងណាស់ ជិតសម្រាលកូនហើយ ។ ឮបែបនេះ សាច់ញាតិក៏ប្រញាប់ទាញម៉ូតូដឹកស្ត្រីរងគ្រោះចេញពីផ្ទះ សំដៅទៅកាន់មណ្ឌលសុខភាព ដើម្បីឱ្យក្រុមគ្រូពេទ្យជំនាញជួយសម្រាល ប៉ុន្តែចៃដន្យ ពេលដឹកមកដល់ត្រង់ចំណុចកើតហេតុ ស្ត្រីរងគ្រោះបានប្រាប់ឱ្យឈប់ម៉ូតូសិន ព្រោះនាងឈឺពោះខ្លាំងណាស់ ទ្រាំមិនបានទៀតទេ! ភ្លាមនោះសាច់ញាតិក៏អែបម៉ូតូឈប់ នៅចិញ្ចើមផ្លូវ ស្ថិតក្នុងសភាពស្ងាត់ទៀតនោះ ក៏ស្រែកហៅខ្លាំងៗ អោយប្រជាពលរដ្ឋនៅក្បែរនោះមកជួយ ហើយគាប់ជួន ក៏មានអ្នកគ្រូពេទ្យម្នាក់ បានធ្វើដុះណើរមកដល់ ក៏ចុះមកជួយសម្រាល រហូតបានកូនប្រុសម្នាក់ប្រកបដោយសុវត្ថិភាពទាំងម្តាយទាំងកូន ។
ក្រោយកើតហេតុ ស្ត្រីខាងលើរួមនឹងទារិកា ទើបនឹងសម្រាលត្រូវបានសមត្ថកិច្ច និងអាជ្ញាធរមូលដ្ឋាន ជួយទាក់ទងហៅរថយន្តសង្គ្រោះមកដឹកបញ្ជូនទៅកាន់មណ្ឌលសុខភាពឃុំព្រែកជីក ដើម្បីពិនិត្យនិងថែទាំ ៕
