ខេត្តកណ្ដាល ៖ បុរសម្នាក់ចេញទៅរកគីង្គក់យកមកធ្វើម្ហូប ដោយសារឃើញពងគីង្គក់មើលទៅទំនង ក៏យកមកចំហុយធ្វើម្ហូបហូបទាំងអស់ បានមួយសន្ទុះក៏មានអាការ ក្អួតចង្អោរ ចំនួនបីដង ក៏បានដាច់ខ្យល់ស្លាប់ខណៈស្ត្រីជាប្រពន្ធបញ្ជូនទៅមន្ទីរពេទ្យ ។
ករណីនេះបានកើតឡើងកាលពីវេលាម៉ោង១និង៣០នាទី រំលងអធ្រាតឈានចូលថ្ងៃទី១៣ ខែកញ្ញា ឆ្នាំ២០១៩ ស្ថិតក្នុងភូមិកោះកែវក្រោម ឃុំកោះកែវ ស្រុកល្វាឯម ខេត្តកណ្តាល ។
មន្ត្រីនគរបាលផ្នែកកោសល្យវិច័យ ស្រុកល្វាឯម បានឲ្យដឹងថា ជនរងគ្រោះមានឈ្មោះ គង់ សុភ័ក្ត ភេទប្រុស អាយុ៤៥ឆ្នាំ មុខរបរជាកសិករ ទីលំនៅភូមិ-ឃុំកើតហេតុខាងលើ ។ ក្រោយធ្វើការពិនិត្យដោយសន្និដ្ឋានថា ករណីនេះបណ្ដាលមកពីជនរងគ្រោះហូបពងគីង្គក់ ទើបបណ្ដាលឲ្យពុលស្លាប់បែបនេះ ។
ប្រភពដដែលបន្តថា មុនពេលកើតហេតុ ជនរងគ្រោះបានចេញពីផ្ទះ ទៅរកចាប់គីង្គក់ នៅខាងក្រោយផ្ទះរបស់ខ្លួន ដើម្បីយកមកធ្វើម្ហូប ពេលចាប់បានគីង្គក់ហើយ ជនរងគ្រោះបានយកគីង្គក់នោះ មកធ្វើម្ហូប ដោយមិនបានយកពងគីង្គក់នោះទៅចោលនោះទេ គឺទុកនៅក្នុងចានរួចហើយយកទៅចំហុយ ហើយហូបបានមួយសន្ទុះក្រោយមក ជនរងគ្រោះក៏មានអាការ ក្អួតបីទៅបួនដង ភ្លាមៗនោះស្ត្រីជាប្រពន្ធ បាននាំជនរងគ្រោះទៅមណ្ឌលសុខភាពឃុំសំបួរ ដើម្បីសង្គ្រោះ តែជាអកុសល ជនរងគ្រោះបានដាច់ខ្យល់ស្លាប់ទៅហើយ ។
បច្ចុប្បន្ន សាកសពជនរងគ្រោះ ត្រូវបានសមត្ថកិច្ចជំនាញ ប្រគល់ទៅឲ្យក្រុមគ្រួសារយកទៅចាត់ចែងធ្វើបុណ្យតាមប្រពៃណី ៕