ពិតជាដំណឹងល្អនៅក្នុងឆ្នាំ២០១៩នេះតែម្តង ៖ សារព៏ត៌មានធំៗលើសកលលោកបានចុះផ្សាយព្រមគ្នា កាលពីថ្ងៃពុធនេះអោយដឹងថា ក្រុមអ្នកវិទ្យាសាស្ត្រ ទើបតែបង្ហាញពីរបកគំហើញដ៏សំខាន់មួយ ក្នុងការស្វែងរកភព ដែលអាចរស់នៅបាន ក្រៅពីភពផែនដីរបស់យើង ។
ក្រុមតារាវិទូ បានរកឃើញចំហាយទឹកនៅក្នុងបរិយាកាស នៃភពមួយឈ្មោះថា K2-18b ដែលអាចមានកម្រិតសីតុណ្ហភាពប្រហាក់ប្រហែល នឹងផែនដី ពោលគឺអាចទ្រទ្រង់ជីវិតបាន ស្ថិតនៅក្រៅប្រព័ន្ធព្រះអាទិត្យរបស់យើង ។
ការរកឃើញនេះ តាមរយៈការប្រើប្រាស់កែវយឺតអវកាស Hubble របស់ទីភ្នាក់ងារអវកាសអាមេរិក NASA ។
បណ្ឌិត Angelos Tsiaras ជាអ្នកដឹកនាំការស្រាវជ្រាវ និងជាអ្នកស្រាវជ្រាវ ផ្នែកផ្នែករូបវិទ្យា និងតារាសាស្ត្រ នៃមហាវិទ្យាល័យទីក្រុងឡុងដ៍ បានសង្កត់ធ្ងន់ថា អ្វីដែលជាការរកឃើញដ៏ធំមួយនេះ គឺក្នុងកំឡុងពេលធ្វើការស្រាវជ្រាវ កាលពីឆ្នាំ២០១៥ ។
លោក Tsiaras បានមានប្រសាសន៍ថា “នេះគឺជាភពតែមួយ ដែលយើងដឹង វានៅក្រៅប្រព័ន្ធព្រះអាទិត្យ ដែលមានសីតុណ្ហភាព ត្រឹមត្រូវក្នុងការទ្រទ្រង់ជីវិត” ។ វាមានបរិយាកាស ហើយមានទឹកនៅក្នុងនោះ ធ្វើឱ្យវាក្លាយជាភពផែនដីថ្មីដ៏ល្អបំផុតសម្រាប់មនុស្សនាពេលបច្ចុប្បន្ននេះ” ។
ភព K2-18b ដែលត្រូវបានគេកំណត់ដោយឈ្មោះថា ភពអេលៀន វាមានទំហំធំជាងផែនដី និងម៉ាសរបស់វាធំជាងផែនដីដល់ទៅ៨ដង ។ ហើយគន្លងគោចរណ៍វិញ គឺស្ថិតនៅក្នុងតំបន់ Habitable Zone នៃផ្កាយរបស់វា គឺមិនឆ្ងាយពេកនិងមិនកៀកពេកឡើយ ។ ដោយសារតែវា ស្ថិតនៅក្រៅប្រព័ន្ធព្រះអាទិត្យ ទើបវាវិលជុំវិញក្នុងតំបន់នៃផ្កាយក្រហមដែលមានទំហំតិចជាងពាក់កណ្តាលនៃព្រះអាទិត្យ ។ ភព K2-18b វាស្ថិតនៅចម្ងាយ១១០ឆ្នាំពន្លឺ ពីភពផែនដីយើង ។ រីឯផ្កាយក្រហម ស្ថិតនៅក្នុងក្រុមតារានិករឡេអូ ។
K2-18b វាគឺជាប្រភេទភពស្ថិតនៅក្នុងចំណោមភពអេលៀន Super Earth ជាង ៤,០០០ ទៀត ដែលអ្នកវិទ្យាសាស្ត្របានរកឃើញ គឺពពួកភពស្រដៀងផែនដី មកទល់សព្វថ្ងៃនេះ ។
ភព K2-18b គឺជាភពដំបូងគេ ដែលមានផ្ទៃជាលក្ខណៈថ្មរឹង ហើយមានបរិយាកាសដែលផ្ទុកទឹក ដោយក្រុមអ្នកវិទ្យាសាស្ត្របានប្រើប្រាស់ទិន្នន័យបណ្ណសារ ដែលទទួលបានដោយតេឡេស្កុប អវកាស Hubble ដើម្បីសង្កេតមើលការឆ្លងកាត់របស់វា រវាងផ្កាយក្រហម និងផែនដី ។ នៅពេលដែលភពផែនដី ធ្វើដំណើរនៅពីមុខផ្កាយ បរិយាកាសរបស់វាបន្សល់ទុកស្នាមនៅលើពន្លឺផ្កាយ ។ ដំណើរឆ្លងកាត់នេះ បានអនុញ្ញាតឲ្យ ក្រុមតារាវិទូ ប្រើបច្ចេកទេសមួយហៅថា ការបញ្ជូនអេកូស័រ ដើម្បីវិភាគស្នាមនោះ ។ ដំណើរការនេះបង្ហាញពីរបកគំហើញ នៃម៉ូលេគុលចំហាយទឹក ក៏ដូចជាវត្តមានអ៊ីដ្រូសែន និងអេលីយ៉ូម ។
ថ្វីបើ ភពអេលៀន អាចមានទឹកនៅក្នុងបរិយាកាស និងសីតុណ្ហភាពប្រហាក់ប្រហែលនឹងផែនដី ប៉ុន្តែមិនមានន័យថាមនុស្សគួរតែចាប់ផ្តើមឆ្ពោះទៅកាន់ភពអេលៀននោះទេ ។ អ្នកវិទ្យាសាស្ត្រនៅតែត្រូវការស្រាវជ្រាវបន្ថែម
ដើម្បីបញ្ជាក់អំពី K2-18b អោយបានច្បាស់ មុនពេលមនុស្សជាតិចាប់ផ្តើមចូលទៅ ។
ឧទាហរណ៍ ការវាស់ទឹក នៅក្នុងបរិយាកាស នៃភពផែនដី លម្អៀងគ្នាពី០.០១ភាគរយ ទៅ៥០ភាគរយ មានន័យថា វាអាចសើម ឬស្ងួត ទៅតាមបរិយាកាសនៃភពនោះ ។ លើសពីនេះទៀត ដោយសារម៉ាស់របស់វា ខ្ពស់ជាងផែនដី ដល់ទៅ៨ដងនោះ អាចធ្វើអោយមនុស្សពិបាកដើរលើភពអេលៀនជាងផែនដី ព្រោះវានឹងធ្វើអោយមានទំនាញផែនដីកាន់តែខ្លាំង រួមផ្សំភពអេលៀននោះ វាធ្វើដំណើរគោចរណ៍ទៅកាន់តែកៀកនឹងផ្កាយក្រហមរបស់វាទៀត មានន័យថា កាំរស្មីយូវី ខ្ពស់ជាងមុន ៕