រាជធានីភ្នំពេញ ៖ ក្រសួងអប់រំ នឹងប្រកាសចេញលទ្ធផលប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) សម្រាប់មណ្ឌលរាជធានីភ្នំពេញ និងខេត្តកណ្តាល នៅម៉ោង៣រសៀល ថ្ងៃទី០៩ ខែកញ្ញា ឆ្នាំ២០១៩នេះ ដោយឡែកតាមបណ្តាខេត្តដទៃទៀត នឹងប្រកាសនៅព្រឹកថ្ងៃទី១០ ខែកញ្ញាស្អែកនេះ ។
នៅព្រឹកថ្ងៃទី០៩ កញ្ញានេះ ក្រសួងអប់រំបានចេញសេចក្តីប្រកាសព័ត៌មានស្តីពី លទ្ធផលប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) សម័យប្រឡង១៩ សីហា ឆ្នាំ២០១៩ មានបេក្ខជនប្រឡងជាប់ មានចំនួន៧៩,០៥២ នាក់ ស្មើនឹង៦៨.៦២ភាគរយ ក្នុងនោះសិស្សជាប់និទ្ទេស A ចំនួន៤៤៣ នាក់, ជាប់និទ្ទេស B ចំនួន២,៤៣០ នាក់, ជាប់និទ្ទេស C ចំនួន៥,៨៤៧ នាក់, ជាប់និទ្ទេស D ចំនួន ១៤,១០០ នាក់ និងនិទ្ទេស E ចំនួន៥៦,២៣២ នាក់ ។
គួរបញ្ជក់ថា ការប្រឡងសញ្ញាបត្រមធ្យមសិក្សាទុតិយភូមិកាលពីថ្ងៃទី១៩ សីហា ២០១៩ កន្លងមក មានបេក្ខជនសរុបចំនួន ១១៧,០៤៣នាក់ ក្នុងនោះមានស្រី ៦០,៤២៧នាក់ និងមានមណ្ឌលប្រឡងចំនួន ២០២ មណ្ឌល នៅទូទាំងប្រទេស ៕