រាជធានីភ្នំពេញ ៖ ប្រមុខរាជរដ្ឋាភិបាលកម្ពុជា បានចេញសារាចរ ដោយសម្តេចតេជោនាយករដ្ឋមន្ត្រី ហ៊ុន សែន បានណែនាំដល់ក្រសួង ស្ថាប័នពាក់ព័ន្ធ និងអាជ្ញាធរដែនដីទាំងអស់ ត្រូវចាត់វិធានការចាំបាច់នានា ត្រៀមទប់ទល់នឹងគ្រោះទឹកជំនន់ កាត់បន្ថយឲ្យបានជាអតិបរមានូវការលំបាក និងការប៉ះពាល់ដល់ទ្រព្យសម្បត្តិ និងអាយុជីវិតរបស់ប្រជាពលរដ្ឋ ។
ក្នុងសារាចរណែនាំចុះថ្ងៃទី០៤ ខែកញ្ញា ឆ្នាំ២០១៩ ស្តីពីការត្រៀមវិធានការទប់ទល់នឹងគ្រោះទឹកជំនន់ សម្តេចតេជោ ហ៊ុន សែន បានលើកឡើងថា យោងតាមការពិនិត្យ សង្កេតតាមដានជាប់ជាប្រចាំលើស្ថានភាពអាកាសធាតុរបស់ក្រសួងធនធានទឹក និងឧតុនិយម បានបង្ហាញថា ដោយសារឥទ្ធិពលរបស់ប្រព័ន្ធសម្ពាធទាប គួបផ្សំនឹងឥទ្ធិពលរបស់ព្យុះទី១៤ ឈ្មោះ កាហ្សីគី និងឥទ្ធិពលនៃខ្យល់មូសុងនិរតីខ្លាំង បានបង្កឲ្យមានការធ្លាក់ភ្លៀងយ៉ាងគំហុក នៅក្នុងខេត្តមួយចំនួនរបស់ព្រះរាជាណាចក្រកម្ពុជា និងនៅតំបន់ផ្ទៃរងទឹកភ្លៀងរបស់ទន្លេមេគង្គ ក្នុងប្រទេសវៀតណាម ប្រទេសថៃ និងប្រទេសឡាវ។ ការធ្លាក់ភ្លៀងយ៉ាងគំហុកនេះ នឹងជំរុញឲ្យទឹកទន្លេមេគង្គហក់ឡើងខ្ពស់ លឿន និងឈានទៅដល់កម្រិតមួយ ដែលបង្កឲ្យមានការលិចលង់នៅខេត្តមួយចំនួន ដែលស្ថិតនៅអមសងខាងទន្លេមេគង្គផ្នែកខាងលើ ។
សូមជម្រាបថា គិតត្រឹមម៉ោង ៧ព្រឹក ព្រលឹមថ្ងៃទី០៤ ខែកញ្ញា ឆ្នាំ២០១៩ ក្រសួងធនធានទឹក និងឧតុនិយម បានប្រកាសថា ទឹកទន្លេមេគង្គ នៅខេត្តស្ទឹងត្រែង បានឡើងលើសកម្រិតកម្ពស់ប្រុងប្រយ័ត្នហើយ ។ ក្នុងនោះ ថ្ងៃទី០៨-០៩-១០ ខែកញ្ញា ឆ្នាំ២០១៩ នៅខេត្តស្ទឹងត្រែង ក្រចេះ កំពង់ចាម ទឹកទន្លេមេគង្គ នឹងអាចកើនឡើងដល់កម្ពស់លើកកម្រិតប្រកាសអាសន្ន។ រីឯនៅទន្លេបាសាក់ ចតុមុខ ភ្នំពេញ កម្ពស់ទឹកនឹងអាចកើនឡើងដល់កម្ពស់ជិតដល់កម្ពស់ប្រកាសឲ្យប្រុងប្រយ័ត្ន។ ដោយឡែក ចំពោះកម្ពស់ទឹកទន្លេមេគង្គក្រោម ទន្លេបាសាក់ ទន្លេសាប និងទឹកក្នុងបឹងទន្លេសាប ក៏ហក់ឡើងទន្ទឹងគ្នាផងដែរ។ ទន្ទឹមនោះ ទឹកនៅតាមបណ្តាស្ទឹងមួយចំនួន ក៏បាន និងកំពុងកើនឡើងជាបន្តបន្ទាប់ផងដែរ ៕
