កំពង់ឆ្នាំង ៖ សាច់កណ្តុរដែលពីមុនមកគេខ្ពើម បែរជាឥឡូវនេះ ត្រូវបានគេដឹកយកមកលក់ស្ទើរតែរាល់ថ្ងៃ ជាងនេះសាច់កណ្តុរត្រូវបានក្លាយជាទំនិញពិសេសមួយ ដែលលក់ដាច់ណាស់ ដើម្បីយកទៅធ្វើម្ហូបប្រចាំថ្ងៃ ឬធ្វើជាគ្រឿងក្លែម ជាអាហារកំពុងពេញនិយមហើយអ្នកដែលខ្ពើមក៏លែងខ្ពើមដែរ ព្រោះក្លាយជាសាច់មានទីផ្សារ ។
ជាក់ស្តែង ស្ត្រីអ្នកទទួលទិញសាច់កណ្តុរនៅកំពង់ទឹកផ្សារក្រោម បានប្រាប់អោយដឹងថា ជារៀងរាល់ព្រឹក គាត់តែងតែមកចាំថ្លឹងប្រមូលទិញសាច់កណ្តុរ ដែលអ្នកភូមិនៅតាមដងទន្លេ ដឹកយកមកលក់ឲ្យ ។ ហើយការប្រមូលទិញសាច់កណ្តុរនេះ មានតែម៉ូយម្នាក់ប៉ុណ្ណោះ ក្នុងមួយព្រឹក ដែលយកមកលក់ឲ្យប្រមាណពី៧០គីឡូ ទៅ១០០គីឡូក្រាម ។
ស្ត្រីអ្នកប្រមូលទិញសាច់កណ្តុរដដែល បានបន្តទៀតថា សាច់កណ្តុរស្រស់នេះ គាត់ទិញពីម៉ូយដឹកយកមកលក់ ក្នុងមួយគីឡូតម្លៃ ៦,០០០ ទៅ៧,០០០រៀល នៅពេលគាត់យកទៅបោះឲ្យម៉ូយបន្តលក់តាមផ្សារ និងកន្លែងលក់ផ្សេងៗទៀត ក្នុងតម្លៃ១០,០០០រៀល ក្នុង១គីឡូក្រាម គ្មាន«អេ»ទេ ឲ្យតែមានលក់គឺគ្មានសល់ ។
ប្រជាពលរដ្ឋដែលជាអ្នករកចាក់សត្វកណ្តុរ បានឱ្យដឹងថា កណ្តុរដែលគាត់ចាក់យកមកលក់វាជាសត្វកណ្តុរត្រូវទឹកលិចព្រៃ ។ នៅពេលចេញចាក់ម្តងៗ មានគ្នីគ្នាពី៤ទៅ៦ទូកពេលខ្លះសម្បូរ ម្នាក់ៗបាន១០ទៅ២០គីឡូដែរ នេះជាមុខរបររួមផ្សំពីការនេសាទត្រីទេ ព្រោះអ្នកខ្លះទំនេរពីការធ្វើស្រែចម្ការ ដើររកចាប់កណ្តុរ ធ្វើឱ្យជីវភាពពួកគាត់បានធូស្រាលមួយកម្រិត នារដូវទឹកទន្លេឡើង ។
សាច់សត្វកណ្តុរត្រូវគេមើលឃើញថា មានដាក់លក់នៅតាមទីផ្សារ ហើយកជាមុខម្ហូបមួយ ដែលកំពុងពេញនិយម សម្រាប់ប្រជាពលរដ្ឋ នៅតាមមូលដ្ឋានផ្សេងៗ មិនថា អ្នកនៅក្នងខេត្តកំពង់ឆ្នាំងនោះទេ នៅតាមកន្លែងផ្សេងៗក្នុងប្រទេសផងដែរ ។
សាច់កណ្តុរត្រូវបានអ្នកស្រុកភាគច្រើនក្នុងភូមិហូបស្ទើរគ្រប់រដូវទៅហើយ ប៉ុន្តែរដូវដែលសាច់ កណ្តុរឆ្ងាញ់គឺនៅរដូវវស្សា ឬអាចនិយាយបានថារដូវទឹកចូលព្រែក ។ រដូវនេះកណ្តុរមានសាច់ ឬខ្លាញ់ច្រើនធាត់មូលនៅពេលយកសាច់វាអាំង ឬចៀនក្រៀមមានក្លិនឈ្ងុយមើលទៅគួរឲ្យចង់ហូប ។
សាច់កណ្តុរភាគច្រើនត្រូវបានប្រជាជនចូលចិត្តហូប ដោយសារជាអាហារនេះមិនប៉ះពាល់ដល់សុខភាពនោះទេ ព្រោះជាសត្វស៊ីស្មៅ ឫសឈើ ស្រូវ ផ្លែឈើព្រៃ ដំណាំកសិកផលមួយចំនួនជាអាហារ គឺជាសត្វស្អាត លើកលែងតែ បើវារស់នៅតាមភូមិដ្ឋាន គេមិនយកធ្វើម្ហូបទេ… អាហ្នុងបានគេខ្ពើម ៕