រាជធានីភ្នំពេញ ៖ កាលពីល្ងាចម្សិលមិញនេះ សហព័ន្ធកីឡាបាល់ទាត់កម្ពុជា បានបញ្ចេញបញ្ចីឈ្មោះកោះហៅកីឡាករ សម្រាប់ប្រមូលផ្តុំហ្វឹកហាត់ត្រៀមការប្រកួតវគ្គជម្រុះ FIFA WORLD CUP 2022 វគ្គជម្រុះជុំទី ២ ។
ក្នងបញ្ជីឈ្មោះដែលចេញជាផ្លូវការនេះ មានកីឡាករចំនួន ៣៥ រូប ដោយក្នុងនោះនឹងត្រូវជម្រុះចេញចំនួន ១២ រូប ព្រោះបញ្ជីឈ្មោះចុងក្រោយតម្រូវឱ្យមានកីឡាករត្រឹមតែ ២៣ រូបតែប៉ុណ្ណោះ ត្រៀមជួបហុងកុង នៅជើងទី១ ក្នុងវគ្គជម្រុះជុំទី២-តំបន់អាស៊ីនៃពានរង្វាន់បាល់ទាត់ពិភពលោក ឆ្នាំ២០២២ នៅកាតា ពូល C នាថ្ងៃទី០៥ ខែកញ្ញាខាងមមុខ នៅលើទីលានពហុកីឡដ្ឋានជាតិ រាជធានីភ្នំពេញ ។
អ្វីដែលគួរឱ្យចាប់អារម្មណ៍នោះ គឺបាត់ឈ្មោះកីឡាករសំខាន់ៗចំនួន៣រូប រួមមាន កីឡាករ ចាន់ វឌ្ឍនាកា, ប្រាក់ មុន្នីឧត្តម និងកីឡាករ ធារី ចន្ថាប៊ីន ធ្វើអោយអ្នកគាំទ្រ មានការភ្ញាក់ផ្អើលជាមួយនឹងការអវត្តមានកីឡាករទាំង៣រូបនេះផងដែរ ។ គេមិនបានដឹងពីមូលហេតុពិតប្រាកដ ធ្វើឲ្យអ្នកទាំងបីគ្មានឈ្មោះក្នុងបញ្ជីបឋមនោះនៅឡើយទេ ។
ជុំវិញរឿងរ៉ាវនេះ ចំពោះអ្នកគាំទ្រនៅតែគោរពតាមការសម្រេចចិត្តរបស់គ្រូបង្វឹកលោក Felix និងលោក Keisuke Honda អ្នកការចាត់ទូទៅក្រុមគោព្រៃកម្ពុជាដែរ ៕
