រាជធានីភ្នំពេញ ៖ នៅថ្ងៃទី២៧ សីហា ម្សិលមិញនេះ នៅក្នុងបណ្តាញសង្គម គេឃើញមានផេកមួយចំនួន បានបង្ហោះពីរូបភាពវីដេអូ នៃការបាញ់សម្លាប់មនុស្សនៅក្នុងផ្សារទំនើបមួយនៅប្រទេសឥណ្ឌូណេស៊ី ត្រូវបានក្រុមបណ្តាញសង្គមហ្វេសប៊ុកមួយចំនួនយកមកផ្សព្វផ្សាយ និងសរសេរបំភ្លើសព័ត៌មានថា ជាករណីបាញ់សម្លាប់នេះ គឺនៅក្នុងផ្សារអ៊ីអន2 នៅក្នុងប្រទេសកម្ពុជាទៅវិញ ការដែលផ្សព្វផ្សាយព៍ត៌មានក្លែងក្លាយបែបនេះ ធ្វើមានការភ័ន្តច្រឡំពីសំណាក់ប្រជាពលរដ្ឋខ្មែរ ។
មន្ត្រីជាន់ខ្ពស់អគ្គស្នងការនគរបាលជាតិបានបញ្ជាក់ថា វីដេអូនៃការបាញ់សម្លាប់មនុស្សនៅក្នុងផ្សារទំនើបមួយ គឺមិនមែននៅក្នុងប្រទេសកម្ពុជានោះទេ ករណីបាញ់សម្លាប់នេះនៅក្នុងផ្សារទំនើបមួយនៅប្រទេស ឥណ្ឌូណេស៊ី ។
ចំណែកឯលោកវរសេនីយ៍ឯក ហួរ ម៉េងវ៉ាង អធិការនគរបាលខណ្ឌសែនសុខ បានធ្វើបដិសេធច្រានចោលព័ត៌មានក្លែងក្លាយមួយនេះ ដោយបានបញ្ជាក់ថា ខ្ញុំអធិការនគរបាលខណ្ឌសែនសុខ សូមបំភ្លឺថាករណីនេះគឺពុំមានកើតនៅក្នុងផ្សារទំនើប AEON2 ទេ ហើយសូមអស់លោកមុននឹងផ្សាយសូមអោយមានមូលដ្ឋានព័ត៌មានអោយច្បាស់លាស់ផង កុំចេះតែផ្សាយដើម្បីបំប៉ោងសភាពការណ៍ ។
ប្រភពព័ត៌មានមួយបានប្រាប់KBNអោយដឹងថា នៅព្រឹកថ្ងៃទី២៨ ខែសីហានេះ ខាងសមត្ថកិច្ចជំនាញកំពុងតែពិនិត្យមើលក្រុមអ្នកបង្ហោះចែកចាយវីដេអូនៃការបាញ់សម្លាប់មួយនេះ នៅលើបណ្តេញសង្គមហ្វេសប៊ុក ដែលបង្កឱ្យមានភាពយល់ច្រឡំ ដើម្បីចាត់វិធានការតាមផ្លូវច្បាប់ហើយ ។
សូមជម្រាបថា សូមប្រជាពលរដ្ឋដែលបានឃើញវីដេអូនេះ សុំកុំយល់ច្រឡំថា កើតឡើងនៅក្នុងប្រទេសកម្ពុជា ហើយសុំកុំធ្វើការបន្តចែកចាយពីមួយទៅមួយ ពីព្រោះវាអាចធ្វើឱ្យប្រឈមមុខនឹងផ្លូវច្បាប់ ៕
