រាជធានីភ្នំពេញ ៖ នាព្រឹកថ្ងៃទី២៤ ខែសីហា ឆ្នាំ២០១៩នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានបញ្ជាក់នៅក្នុងគ្រុបអេឡិចត្រូនិកមួយអោយដឹងថា «ទាក់ទងបញ្ហាព្រំដែនកម្ពុជា-ឡាវ សម្តេចបានជួបជាមួយមេបញ្ជាការទី៩ នៅជួរមុខ និងជួបជាមួយនាយករដ្ឋមន្ត្រីឡាវ ដោយបានពិភាក្សាគ្នា ទាក់ទងរឿងព្រំដែន ។ ឥឡូវនឹង កំពុងតែបញ្ជាឲ្យមេបញ្ជាការជួរមុខ ជួបគ្នាចរចា ដើម្បីដកទ័ពរៀងៗខ្លួន» ។
សម្តេចតេជោ ហ៊ុន សែន ក៏បានបញ្ជាក់ផងដែរ “ដោយសារតែ ផ្តើមចេញពីប្រជាពលរដ្ឋខ្មែរយើងម្នាក់ ទៅបង្កបង្កើនផល នៅក្នុងដី ដែលមិនទាន់ដោះស្រាយហ្នឹង! ហើយគេ(ឡាវ) ក៏មកដក… រួចហើយឡាវក៏ល្បាត.. គេក៏បញ្ជូនកម្លាំងមកបន្ថែមចាប់ពី២នាក់ឡើងដល់៦០នាក់.. ហើយយើង ក៏ទៅទប់នៅកន្លែងហ្នឹង… ហើយក៏ទាក់ទងគ្នារាល់ថ្ងៃទេ… ទាហានកម្ពុជា និងទាហានឡាវ នៅតាមទល់ដែន វាមានស្អី ជាមួយគ្នា ។ ស៊ីបាយជាមួយគ្នា ទល់មុខគ្នា នៅហ្នឹង” ។
ទោះជាយ៉ាងណា សម្តេចតេជោ បន្ថែមអោយដឹងថា នៅពាក់កណ្តាលខែកញ្ញា នាយករដ្ឋមន្ត្រីឡាវ មកធ្វើទស្សនកិច្ចនៅស្រុកខ្មែរ ដើម្បីបន្តកិច្ចការងារទាក់ទងនឹងរឿងព្រំដែន ។
សូមបញ្ជាក់ថា សម្តេចតេជោ ហ៊ុន សែន បញ្ជាក់ពីស្ថានភាពព្រំដែនកម្ពុជា-ឡាវខាងលើនេះ បានធ្វើឡើង ខណៈដែលរដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានផ្សព្វផ្សាយនូវរបាយការណ៍របស់មន្ទីរព័ត៌មានខេត្តព្រះវិហារ កាលពីព្រឹកម្សិលមិញ ថ្ងៃទី២៣ ខែសីហា ឆ្នាំ២០១៩ បង្ហាញពីការបង្កើនកងទ័ពរបស់ឡាវ មកកាន់ចំណុចព្រំដែនខេត្តព្រះវិហារ ។ រីឯកងទ័ពកម្ពុជា ក៏ត្រូវបានបន្ថែមចំនួនទ័ពទៅកាន់តំបន់នោះ ហើយកម្ពុជា ក៏បានប្រជុំត្រៀមជម្លៀសប្រជាជន៤ភូមិ ចេញពីតំបន់ជម្លោះ នៅពេលមានហេតុការណ៍ប៉ះទង្គិចដោយអាវុធណាមួយកើតឡើង ៕
នៅព្រឹកនេះ ! កម្លាំងជួរមុខកម្ពុជា និងយោធាឡាវ កំពុងឈមមុខដាក់គ្នា
