ខេត្តសៀមរាប ៖ រូបភាពប៉ុន្មានសន្លឹកធ្វើអោយផ្ទុះការរិះគន់ដ៏កក្រើកនៅលើហ្វេសប៊ុក ដោយបង្ហាញពីស្ត្រីម្នាក់ ដែលអ្នកប្រើប្រាស់បណ្តាញសង្គមអះអាងថា ជាមន្ត្រីឆៀករថយន្ត នៅឯខេត្តសៀមរាប ។ ផ្ទុះការរិះគន់នោះ ក៏ព្រោះតែមន្ត្រីបម្រើសេវាសាធារណៈ រូបនោះបានយកជើងរបស់ខ្លួន ទៅចង្អុលស្លាកលេខម្ចាស់យានយន្ត ដែលប្រជាពលរដ្ឋយកមកឲ្យមន្ត្រីធ្វើការត្រួតត្រាពិនិត្យមើលនៅកន្លែងឆៀករថយន្តខេត្តសៀមរាប ។
បើតាមម្ចាស់គណនីហ្វេសប៊ុកឈ្មោះ យុវជន សន្តិភាព ក៏បានបង្ហោះផងដែថា «មន្ត្រីឆៀកឡានកំពូលឈ្លើយ! ចរិតមន្ត្រីមន្ទីរសាធារណការនិងដឹកជញ្ជូនខេត្តសៀមរាប កំពូលឈ្លើយ យកជើងរបស់ខ្លួន ទៅចង្អុលស្លាកលេខម្ចាស់យានយន្តរបស់គេ ដែលគេស្រលាញ់ ស្ទើររយះសំពត់ ថែមទាំងប្រើសម្ដីគួរឲ្យស្អប់ខ្ពើម មិនសាកសម្យជាមន្ត្រីបម្រើសេវាសាធារណៈ នៅកន្លែងឆៀករថយន្តខេត្តសៀមរាបសោះ ។ នេះបើយោងតាមប្រជាពលរដ្ឋ ដែលបានយកឡានទៅឆៀកនៅខេត្តសៀមរាប កាលពីថ្ងៃទី14 ខែសីហា ឆ្នាំ2019» ។
ក្នុងនោះដែរក៏មានមតិដទៃទៀត ធ្វើការរិះគន់ទៀតថា «អាណិតតែម្ចាស់ឡាន ឈរហាក់បីដូចជាអស់សង្ឃឹម នូវទង្វើមិនសមរម្យរបស់ ភ្នាក់ងារអង្គភាពរដ្ឋមួយនេះ ។ គាត់មានជំនាញពិសេស ខាងមើលស្លាកលេខ ហ្សិន ឬក្លែងក្លាយ ដល់តែគាត់ យកជើង ស្ទាបផ្ទាល់ បានច្បាស់ ។ គាត់អត់ហ៊ានយកដៃស្ទាប ខ្លាចខូចក្រចកដៃ! ល្ងាចទៅស៊ីការគេផង ! អស្ចារ្យម៉ងលោកជំទាវ ខាងត្រួតពិនិត្យយានយន្ត ខេត្តសៀមរាប ។ បងប្អូនគាំទ្រទេ ? បើហៅមន្ត្រីរូបនោះ ឲ្យមកសុំទោសម្ចាស់ឡានដោយផ្ទាល់ ! ជាជាងការចេញមុខសុំទោសពីមេកើយរបស់គាត់» ។
ការរិះគន់នៅតែផុសផុលមតិមួយទៀតលើកឡើងថា «ចរិតរបៀបនេះហើយដែលចេះតែនាំអោយរាស្ត្រក្ដៅក្រហាយ សូមផ្លាស់ប្ដូរឥរិយាបថមិនត្រឹមត្រូវរបស់អ្នកក្នុងការបំពេញមុខងារសាធារណៈ ! ប្រសិនជាអ្នកគិតថា អ្នកជាចៅហ្វាយ សូមលាឈប់ពីការងារចុះ ព្រោះមន្ត្រី ជាអ្នកបំរើរាស្ត្រ មិនមែនចៅហ្វាយរាស្ត្រទេ សូមមន្ត្រីនានាកុំយកតម្រាប់តាមមន្ត្រីរូបនេះ ។ នេះជារូបភាពមន្ត្រីសាធារណៈការខេត្តសៀមរាប
» ។
នៅមានមតិ រិះគន់ ជាច្រើនទៀត ប៉ុន្តែ KBN សូមលើកយកមកបង្ហាញជូនត្រួសៗតែប៉ុណ្ណោះ ។ ទោះជាយ៉ាងណាអ្នកសារព័ត៌មានយើងនៅមិនទាន់បានទាក់ទងសុំការបំភ្លឺពីប្រធានមន្ទីរសាធារណការ និងដឹកជញ្ជូន ខេត្ដសៀមរាប នៅឡើយទេ ៕