ខេត្តសៀមរាប ៖ អគ្គិភ័យមួយបានឆាបឆេះ ដោយសារផ្ទុះធុងហ្គាស នៅកន្លែងបញ្ចូលហ្គាសរថយន្ត២៤ម៉ោង LPG នៅតាមបណ្តោយផ្លូវលោកតាណឺយ ខណៈកំពុងបញ្ចូលហ្គាសចេញពីរថយន្ត១គ្រឿង បណ្តាលឲ្យមានអ្នករបួសធ្ងន់ស្រាលផងដែរ ។
ហេតុការណ៍នេះ បានកើតឡើងនៅវេលាម៉ោង០១និង១៥នាទី រសៀលថ្ងៃទី១៤ ខែសីហា ឆ្នាំ២០១៩ ស្ថិតនៅតាមបណ្តោយផ្លូវលោកតាណឺយ មុខអតីតមន្ទីរពេទ្យនាគទេព ក្នុងភូមិបន្ទាយចាស់ សង្កាត់ស្លក្រាម ខេត្តសៀមរាប ។
បើតាមប្រភពព័ត៌មានបានឲ្យដឹងថា មានស្ត្រីបរទេសចំនួន២នាក់ ត្រូវបានរងរបួស ខណៈដែលកំពុងជិះម៉ូតូឌុបគ្នា ស្រាប់ៗមកដល់កន្លែងកើតហេតុនោះ ក៏ផ្ទុះឡើង បង្កឲ្យមានភ្លើងឆាបឆេះដល់ពួកគាត់តែម្តង ។ ដោយឡែក បុគ្គលិកលក់ និងតៃកុងឡានពុំមានរងរបួសឡើយ ។
តាមសាក្សីនៅកន្លែងកើតហេតុ បានប្រាប់ថា មុនដំបូងមានរថយន្ត១គ្រឿង បានចូលទៅដាក់ហ្គាសនៅទីនោះ ស្រាប់តែមួយសន្ទុះ ក៏ឮសូរផ្ទុះ និងបង្កជាអណ្តាតភ្លើងឡើង បណ្តាលឲ្យផ្ទះអ្នកជិតខាង រងការខូចខាត បែកកញ្ចក់ខ្ទេចនៅក្នុងផ្ទះ ភ្លាមៗប្រជាពលរដ្ឋនាំគ្នាជួយទាញទីយោបាញ់ទឹកដែរ ប៉ុន្តែដោយសារសន្ទុះនៃហ្គាស ធ្វើឲ្យវាឆាបឆេះកាន់តែខ្លាំង ទើបពួកគាត់នាំគ្នា រត់យកឥវ៉ាន់រៀងៗខ្លួនចេញពីផ្ទះ ។
ក្រោយកើតហេតុបន្តិច គេឃើញមានរថយន្តពន្លត់អគ្គិភ័យរបស់ស្នងការនគរបាលខេត្តជាច្រើនគ្រឿងបានចេញជួយអន្តរាគមន៍បាញ់ពន្លត់ផងដែរ ។ ចំណែកឯទំហំនៃការខូចខាតនោះ នៅមិនទាន់មានការបញ្ជាក់ច្បាស់ពីអាជ្ញាធរនៅឡើយនោះទេ។
យោងទៅតាមគណនីហ្វេសប៊ុកមួយដែលមានឈ្មោះថា ស៊ីម ចាន់ស៊ី បានធ្វើការលើកឡើងថា ៖ «អាណិតគាត់ណាស់ ត្រូវភ្លើងឆេះខ្លួនឯង ក្រោយពីពន្លត់អគ្គីភ័យមួយកន្លែង នៅផ្លូវលោកតានើយ ក្នុងក្រុងសៀមរាប សូមជម្រាបជូន នគរបាលនៃស្នងការដ្ឋាននគរបាលខេត្តសៀមរាបយើង មេត្តាជ្រាបថា នគរបាលយើងម្នាក់ ឈ្មោះ ហួត មុនីពិសាខ បានរងរបួសធ្ងន់ បន្ទាប់ពីជួយអន្តរគមន៍ បាញ់ទឹកពន្លត់ ករណីផ្ទុះធុងហ្កាស បង្ករជាអគ្គីភ័យឆាបឆេះ នៅម្តុំផ្លូវលោកតានើយ ទល់មុខពេទ្យនាគទេព ក្នុងក្រុងសៀមរាប កាលពីវេលាម៉ោង១៣:៣០នាទីថ្ងៃទី១៤ខែសីហាឆ្នាំ២០១៩ នេះ ។ បច្ចុប្បន្ន នគរបាលយើងរូបនេះ កំពុង សំរាកព្យាបាល នៅមន្ទីពេទ្យបង្អែកខេត្តសៀមរាប ។ សូមបួងសួងដល់វត្ថុស័ក្តិសិទ្ធតាមថែរក្សាគាត់ សូមរួចផុតពីគ្រោះថ្នាក់ផងចុះ» ៕