រាជធានីភ្នំពេញ ៖ នៅព្រឹកថ្ងៃទី១៣ សីហា ២០១៩នេះ កម្លាំងសមត្ថកិច្ចព្រហ្មទណ្ឌ បានបញ្ជូនខ្លួនបុរសម្នាក់ឈ្មោះ សេក សុខជា មកកាន់សាលាដំបូងរាជធានីឋភ្នំពេញ ដើម្បីប្រគល់ឲ្យតំណាងអយ្យការ បើកការស៊ើបសួរ និងចោទប្រកាន់តាមផ្លូវច្បាប់ ក្នុងករណីបុគ្គលរូបនេះ បានប្រើល្បិចបោកប្រាស់ប្រជាពលរដ្ឋថា ខ្លួនបានស្គាល់អ្នកធំនៅតាមបណ្តាក្រសួងមន្ទីរនានា ហើយលួងលោមឲ្យក្រុមជនរងគ្រោះជឿទុកចិត្ត ទើបពួកគាត់បានប្រគល់លុយឲ្យជាបន្ដបន្ទាប់ទាំងអស់ ប្រមាណ៣៧៨,៥០០ដុល្លារ ។
មន្ត្រីសមត្ថកិច្ច បញ្ជាក់ថា ដើមចមនៃការឃាត់ខ្លួនជនសង្ស័យឈ្មោះ សេក សុខជា ដោយសារជននេះបានយកឈ្មោះថ្នាក់ដឹកនាំ ទៅដើរបោកប្រាស់គេប្រជាពលរដ្ឋ ដើម្បីរត់ការចូលបម្រើការនៅតាមក្រសួងមួយចំនួន យកអស់ប្រាក់ប្រមាណ៣៧ម៉ឺនដុល្លារអាមេរិក ។ រហូតដើ់មានពាក្យបណ្តឹងពីជណរងគ្រោះទើបកម្លាំងនាយកដ្ឋាននគរបាលព្រហ្មទណ្ឌ នៃអគ្គស្នងការដ្ឋាននគរបាលជាតិ តាមស្រាវជ្រាវ រហូតឈានដល់ការចាប់ខ្លួនបាន កាលពីល្ងាចថ្ងៃទី១០ ខែសីហា ឆ្នាំ២០១៩កន្លងទៅ ។
ជាមួយគ្នានេះដែរ ស្ត្រីជាមន្ត្រីយោធាជើងអាកាសម្នាក់ ត្រូវបានសមត្ថកិច្ចបញ្ជូនទៅតុលាការម្សិលមិញ ពាក់ព័ន្ធករណីឆបោកលុយជាង ១២ ម៉ឺនដុល្លារអាមេរិក ពីជនរងគ្រោះជាថ្នូរនឹងការសន្យាជួយឱ្យមានតួនាទីជាមន្ត្រីយោធាក្នុងក្របខ័ណ្ឌក្រសួងការពារជាតិ ។
តាមដីកាបញ្ជាឲ្យចូលខ្លួនចុះថ្ងៃទី ៣១ ខែ កក្កដា ឆ្នាំ ២០១៩ ដោយលោក ខៀវ ផល្លា តំណាងអយ្យការអមសាលាដំបូងរាជធានីភ្នំពេញ បានឲ្យដឹងថា ស្ត្រីជនសង្ស័យដែលត្រូវបានឃាត់ខ្លួន ករណីឆបោកលុយជាង ១២ ម៉ឺនដុល្លារ មានឈ្មោះ ម៉ី ផានិត អាយុ ៤៤ ឆ្នាំ មានតួនាទីជាជំនួយការសម្ភារនៃបញ្ជាការដ្ឋានកងទ័ពជើងអាកាស មានលំនៅផ្ទះលេខ ១០៣ ផ្លូវលេខ ៣ ភូមិក្រាំងអង្ក្រង សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ។ ដីកាដដែលនោះ បានបញ្ជាឲ្យជនសង្ស័យរូបនេះ ចូលខ្លួននៅតុលាការឲ្យបានមុនថ្ងៃទី ១៥ ខែ សីហា ដើម្បីសាកសួរលើបណ្តឹងរបស់ឈ្មោះ សែម ស៊ីថា ភេទប្រុស អាយុ ៥៣ ឆ្នាំ ពីបទឆបោក ៕
