ចេកពងមាន់ គឺជាឈ្មោះភាសាជាតិ និងមានឈ្មោះវិទ្យាសាស្ត្រថា “ Musa aromatica” និងមានឈ្មោះ ជាភាសាអង់គ្លេស “Chicken-Egg Banana”។ ប្រភេទចេកនេះ ត្រូវបានគេនិយមចូលចិត្តបរិភោគ និងប្រើប្រាស់ជាទូទៅ ដោយប្រជាជនកម្ពុជា គ្រប់ជាន់ថ្នាក់។ ចេកពងមាន់ ភាគច្រើន ត្រូវបានគេនិយមដាំ នៅតាមដីសណ្តទន្លេមេគង្គ ជាពិសេសនៅតាមតំបន់កោះដុះថ្មី ជាប្រភេទរុក្ខជាតិ ប្រជាប្រិយ ដែលប្រជាជនខ្មែរ និយមដាំដុះ នៅក្នុងអំឡុងខែមិថុនា និងខែកក្កដា។ គេត្រូវចំណាយពេលវេលា រហូតដល់ទៅ ៨ ឬ១០ខែឯណោះ ទម្រាំបានផល។ ចេកអត្តសញ្ញាណជាតិមួយនេះ ត្រូវបានគេដាំនៅកម្ពុជាជាយូរលង់ណាស់មកហើយ បើទោះជាដំណាំដែលមានប្រភពពីឥណ្ឌាក៏ដោយ ។
ចំពោះបងប្អូនណាដែលមានបំណងចង់ដាំដំណាំនេះ ក៏ប៉ុន្តែមិនមានបច្ចេកទេសគ្រប់គ្រាន់ក្នុងការបង្កបង្កើនផល តើត្រូវដាំវានៅរដូវណា នៅឯណាំ ដាំដូចម្ដេចទើបទទួលបានទិន្នផលខ្ពស់ ដូចនេះដើម្បីជាគន្លិះក្នុងការស្រាយចម្ងល់របស់ប្រជាកសិករ យើងនឹងបង្ហាញពីរបៀបដាំដូចខាងក្រោម៖
១/. ការរៀបចំដីដាំ
- ជីករណ្តៅ ទំហំ៤តឹកបួនជ្រុង និងជម្រៅ២តឹក
និងចន្លោះពីគុម្ពមួយទៅគុម្ពមួយ ២ម៉ែត្រ ។
- ក្នុងរណ្តៅនីមួយៗ ត្រូវដាក់ជីលាមកសត្វពុកផុយ១បង្គី
ដោយលាយច្របល់ជាមួយបាតដី ។
២/. ការដាំដុះ
ការដាំដុះ អាចធ្វើឡើងដោយ២វិធី ។
វិធីទី១ យកគល់ចេកទៅដាំ ៖ យកគល់ចេកពុះជា២ចំណែក ហើយយកមួយចំណែកដាក់ដាំក្នុងរណ្តៅ ដោយកប់គល់ផ្ងារឡើងលើ ។
វិធីទី២ យកកូនចេកទៅដាំ ៖ យកកូនចេកដែលមានកម្ពស់ ៣-៤តឹក ទៅដាំ ដោយកប់ក្នុងជម្រៅ១,៥តឹក ពោលគឺពាក់កណ្តាលដើម ។
៣/. ការថែទាំ
– គ្របសំរាម និងស្លឹកឈើនៅគល់ចេកជាប្រចាំ នៅពេលសំរាម និងស្លឹកឈើចាប់ផ្តើមរលួយ ជ្រុំកប់ចូលក្នុងដី ហើយគ្របមួយសារទៀត ។
– ស្រោចទឹករយៈពេល៣ថ្ងៃម្តង ពេលកូនចេកនៅតូច (រដូវប្រាំង) ។
– ដាក់ជីលាមកសត្វបន្ថែម ព្រមទាំងជ្រុំកប់នូវកម្ទេចសំរាមចូលក្នុងដី ដើម្បីបង្កើនជីជាតិដី ជីលាមកសត្វដែលប្រើ ត្រូវជាជីដែលពុកផុយ ។
– បាចទឹកចេញ នៅពេលដែលមានភ្លៀងច្រើន ទឹកដក់នៅក្នុងចម្ការ ។
– ទុកតែ២ដើម ក្នុងមួយគុម្ព ដើម្បីឱ្យផ្លែលូតលាស់ធំល្អ ។
– ត្រូវឧស្សាហ៍កាប់ធាងដែលដុះសាខាចេញ ដើម្បីឱ្យមានពន្លឺថ្ងៃចូលក្នុងចម្ការបានគ្រប់គ្រាន់ ។
៤/. ការប្រមូលផល
ក្រោយដាំបានរយៈពេល៧ទៅ៨ខែ ចេកនឹងចាប់ផ្តើមផ្លែ។
សរុបមកបច្ចេកទេសក្នុងការដាំចេកពងមាន់នេះ មិនមានអ្វីពិបាកទេដោយពួកយើងគ្រាន់តែដាំដុះវាឲ្យត្រូវតាមលក្ខខណ្ឌ ដូចជារដូវការ សណ្ឋានដី ការជីករណ្ដៅ ជ្រើសរើសពូជ និងការថែទាំ ការណាដែលយើងដាំវាបានត្រឹមត្រូវតាមបច្ចេកទេសនោះ ទិន្នផលក៏យើងទទួលបានខ្ពស់ ហើយការនាំចេញទៅកាន់ទីផ្សារតម្លៃវាក៏ខ្ពស់ទៅតាមនិង ៕