បាងកក ៖ សំឡេងផ្ទុះយ៉ាងខ្លាំង ត្រូវបានគេឮ ចេញពីកន្លែងផ្សេងៗគ្នា យ៉ាងហោចណាស់មាន៣កន្លែង នៅក្នុងទីក្រុងបាងកក នាព្រឹកថ្ងៃសុក្រ ទី០២ សីហា ២០១៩នេះ ដោយមនុស្ស២នាក់ ត្រូវបានប៉ូលិសរាយការណ៍ថា បានរងរបួស ។
ប៉ូលីសថៃបានរាយការណ៍ថា សំឡេងស្រដៀងនឹងការផ្ទុះគ្រាប់បែក នៅស្ថានីយ៍ BTS ប្រហែលម៉ោង០៨និង៥០ព្រឹក ។ កម្លាំងប៉ូលីសក៏បានព័ទ្ធជុំវិញ ដីក្បែរច្រកចេញទាំងពីរ ហើយបានបិទច្រកចេញ ចំនួនទី៣ និងទី៤ ដោយសារហេតុផលសុវត្ថិភាព ដើម្បីពិនិត្យមើលមូលហេតុនៃការផ្ទុះនេះ ។
យោងតាមប្រព័ន្ធផ្សព្វផ្សាយក្នុងប្រទេសថៃ ពិសេសនៅលើបណ្តាញសង្គម Twitter បានបង្ហាញថា កញ្ចក់មួយសន្លឹកនៅលើវេទិកា នៃស្ថានីយ៍ ត្រូវបានបែកខ្ទេចខ្ទី ។
ដោយឡែក ប៉ូលីសក៏បានរាយការណ៍ពីការផ្ទុះយ៉ាងខ្លាំងមួយទៀត នៅលើផ្លូវរ៉ាម៉ា ៩ បណ្តាលអោយអ្នកសម្អាតផ្លូវក្រុងចំនួន ២ នាក់ បានរងរបួសផងដែរ នៅវេលាម៉ោង ៨និង៥០នាទី ក្នុងពេលដំណាលគ្នា ។
ខណៈនេះ ប៉ូលីសកំពុងបើកការស៊ើបអង្កេតនៅកន្លែងកើតហេតុ ៕
