បើនិយាយដល់ប្រទេសកសិកម្មដែលមានភាពរីកចំរើន ជឿនលឿនដល់កំពូលនោះអ្នកនឹងគិតដល់ប្រទេសអ៊ីស្រាអែល ដែលជាប្រទេសមួយមានផ្ទៃដីតូច ហើយស្ថិតនៅលើវាលខ្សាច់សាហារ៉ា និងហ៊ុមព័ទ្ធដោយទឹកសមុទ្រប្រៃ គ្មានទឹកប្រើប្រាស់ គ្មានប្រភពទឹកសម្រាប់ប្រើធ្វើជាមូលដ្ឋានផ្គត់ផ្គង់ទឹក ដែលជាបច្ច័យមួយអាក្រក់សម្រាប់ការធ្វើកសិកម្ម។ មានផ្ទៃដីចំនួនត្រឹមតែប្រមាណជជា ២០ភាគរយប៉ុណ្ណោះ ដែលអាចដាំដំណាំបាន ឬអាចហៅថាជាដីសម្រាប់ធ្វើកសិកម្ម។ ដែលជាហេតុធ្វើឲ្យប្រជាជននៅក្នុងប្រទេសដ៏តូចមួយនេះនៅមិនស្ងៀម ក្នុងការសិក្សាស្រាវជ្រាវរកវិធីសាស្ត្រដាំដុះកសិកម្មឲ្យមានដំណើរការឡើង។
កាលពីសម័យមុន ដូនតារបស់អ៊ីស្រាអែល បានដាក់ដុំថ្មជុំវិញដំណាំរបស់ខ្លួនដើម្បីប្រមូលទឹកសន្សើមពីក្នុងខ្យល់អាកាស ហើយឥឡូវ គំនិតនេះត្រូវបានយកមកអភិវឌ្ឍជាមួយបច្ចេកវិទ្យាបច្ចុប្បន្ន។ ក្រុមហ៊ុនអ៊ីស្រាអែលTal-Ya បានអភិវឌ្ឍឧបករណ៍ដើម្បីប្រមូលទឹកសន្សើមសម្រាប់ស្រោចស្រប់ដំណាំខណៈដែលទឹកក្នុងប្រទេសនេះ មានការខ្វះខាតខ្លាំង។
ការបង្កើតថ្មីនេះមានផលប្រយោជន៍អេកូឡូស៊ីជាច្រើនដែលហួសពីការសន្សំទឹកធម្មតា។ឧបករណ៍នេះ មានតម្លៃត្រឹម១ដុល្លារប៉ុណ្ណោះសម្រាប់ប្រើប្រាស់លើរុក្ខជាតិមួយដែលឧបករណ៍នេះត្រូវដាក់ជាប់នឹងដីផ្ទាល់។ ឧបករណ៍នេះ ត្រូវបានចោះប្រហោងកណ្ដាលសម្រាប់ឲ្យរុក្ខជាតិលូតលាស់ ហើយផ្នែកជុំវិញសម្រាប់ទាក់ទាញទឹកសន្សើមមកស្រោចស្រប់ដំណាំ។ លើសពីនេះ ឧបករណ៍ដែលប្រើប្រាស់ហើយ ក៏អាចផ្លាស់ប្ដូរសម្រាប់ដាក់លើរុក្ខជាតិផ្សេងទៀតដោយសារវាមានស្រទាប់ការពារ UV ហើយមិនខូចគុណភាពក្រោមកម្ដៅថ្ងៃ ឬថ្នាំសម្លាប់សត្វល្អិតនោះទេ ៕
តាមការបញ្ជាក់របស់ក្រុមហ៊ុនផលិតឧបករណ៏នេះ សម្រាប់ប្រើជាមួយ ដំណាំគឺវាអាចជួយសន្សំសំចៃទឹកបាន៥០% ដោយមានការទទួលស្គាល់ពីក្រសួងកសិកម្មផ្ទាល់របស់ប្រទេសអ៊ីស្រាអែល ៕
