សមាជិកព្រឹទ្ធសភាអាមេរិកប្រចាំរដ្ឋ Nevada លោកស្រី Jacky Rosen បានជំរុញឱ្យប្រជាពលរដ្ឋអាមេរិក គិតពិចារណា២ដងសិន មុនសម្រេចចូលតំបន់សម្ងាត់៥១ «Area 51» ។ លោកស្រីបានព្រមានថា ការសម្រុកចូលទៅកាន់បន្ទាយយោធាតំបន់៥១ ឬ Area 51 មិនមែនជារឿងកម្សាន្តនោះទេ ។
ការព្រមានខាងលើរបស់លោកស្រី Jacky Rosen ធ្វើឡើងក្រោយអ្នកប្រើប្រាស់ បណ្តាញសង្គមអាមេរិកប្រមាណជា១.៨លាននាក់ បានចុះឈ្មោះតាមបណ្តាញអនឡាញ ថានឹងចូលរួមព្រឹត្តិការណ៍មួយ នៅលើហ្វេសប៊ុកដាក់ឈ្មោះថា «Storm Area 51, They Can’t Stop All of Us» ដែលជាផែនការរៀបចំប្រមូលផ្តុំគ្នា ដើម្បីសម្រុកលុកលុយចូលបន្ទាយសំខាន់ខាងលើ បន្ទាប់ពីមានការបំផុសបំផុលចង់ចូលទៅក្នុងទីតាំងនោះ ដើម្បីបានដឹងអំពីអាថ៌កំបាំង ដែលគ្រប់គ្នាងឿងឆ្ងល់រាប់ទសវត្សរ៍មកហើយ ។
លោកស្រី Jacky Rosen បានលើកឡើងកាលពីថ្ងៃទី២៤ ខែកក្កដា ឆ្នាំ២០១៩ យ៉ាងដូច្នេះថា ៖ «រាល់ការសម្រុកចូលមូលដ្ឋានយោធា នៃក្រសួងការពារជាតិ មិនមែនជារឿងមានសុវត្ថិភាពនោះទេ ។ ពោលគឺវាគ្មានសុវត្ថិភាពឡើយសម្រាប់អ្នកដែលកំពុងការពារវា ហើយវាក៏មិនមានសុវត្ថិភាពដែរ សម្រាប់អ្វីដែលយើងកំពុងការពារនៅខាងក្នុង Area 51» ។ ទោះជាយ៉ាងណាលោកស្រីមិនបានបញ្ជាក់អ្វីលម្អិតពីអ្វីដែលមាននៅក្នុង Area 51 នោះទេ ដោយគ្រាន់តែបង្ហើបថា សូម្បីតែរូបលោកស្រីផ្ទាល់ក៏មិនដែលបានចូលក្នុង Area 51 នោះផង ។
Area 51 គឺជាបន្ទាយយោធាមួយនៃមូលដ្ឋានទ័ពអាកាស Edwards ស្ថិតនៅក្នុងរដ្ឋណេវ៉ាដា (Nevada) ដែលមនុស្សមួយចំនួនជឿថា ជាកន្លែងដែលរដ្ឋាភិបាលអាមេរិក លាក់ទុកអាថ៌កំបាំងផ្សេងៗ ពីពិភពលោក រួមមានពួកអេលៀន (Aliens) ជាដើម និងជាកន្លែងផ្ទុកឯកសារដែលផ្តល់នូវភស្តុតាងពីមនុស្សក្រៅភព ។
ចំណែកព្រឹទ្ធសមាជិកមួយរូបទៀតប្រចាំរដ្ឋ Nevada គឺលោកស្រី Catherine Cortez-Masto បានថ្លែងថា លោកស្រីមិនបានដឹងពីគោលបំណងពិតប្រាកដដែលមនុស្សទាំងនោះ ចង់សម្រុកចូលតំបន់៥១ឡើយ ។ ប៉ុន្តែលោកស្រីយល់ថា វាគ្រាន់តែជាការធ្វើលេងកម្សាន្តតែប៉ុណ្ណោះ ។
ដំបូងឡើយមនុស្សភាគច្រើន និងសូម្បីតែមន្ត្រីអាមេរិក ក៏និយាយថា វាត្រឹមជាការលេងសើច តែមួយរយៈចុងក្រោយនេះ ការផុសផុលកាន់តែខ្លាំងឡើង រហូតដល់អ្នកលេងហ្វេសបុកជិត២លាននាក់បានអះអាងថា ពួកគេនឹងចូលរួមព្រឹត្តិការណ៍ចូលទៅកាន់តំបន់៥១ ឬ Storm Area 51 គ្រោងនឹងធ្វើឡើងនៅម៉ោង៣ព្រឹកទាបភ្លឺថ្ងៃទី២០ ខែកញ្ញា ឆ្នាំ២០១៩ ខាងមុខនេះ ។ រីឯសណ្ឋាគារនៅតំបន់នោះ ត្រូវបានគេរាយការណ៍ថា កក់ពេញអស់ទៅហើយ ដោយបង្ខំឱ្យអ្នកចូលរួមជាច្រើនត្រូវបោះតង់ដេកចាំ ។
គួរបម្រាបថា ចំពោះគម្រោងនេះ ត្រូវបានអ្នកនាំពាក្យកងទ័ពអាកាសអាមេរិកព្រមានដែរថា នឹងចាត់វិធានការទប់ស្កាត់មិនឱ្យពួកគេចូលតំបន់សម្ងាត់នេះបានឡើយ ។ «ការប៉ុនប៉ងណាមួយ ចូលតំបន់ហ្វឹកហ្វឺនយោធាដោយខុសច្បាប់ គឺជាគ្រោះថ្នាក់» ។
មូលដ្ឋាននេះ ត្រូវបានប្រើប្រាស់ដោយកងទ័ពអាកាសអាមេរិកប៉ុណ្ណោះ កន្លងមក យន្តហោះទម្លាក់គ្រាប់បែក B-2 បានធ្លាប់ធ្វើតេស្ត នៅតំបន់នេះផងដែរ ៕
