រាជធានីភ្នំពេញ+កំពង់ស្ពឺ ៖ នាយកដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែន នៃអគ្គស្នងការដ្ឋាននគរបាលជាតិ បានចាប់ខ្លួនមន្ដ្រីនគរបាលកម្ពុជាចំនួន៣នាក់ និងបញ្ជូនទៅតុលាការ ដែល២នាក់ ជាមន្ដ្រីនៅអគ្គនាយកដ្ឋានអត្តសញ្ញាណកម្ម និងម្នាក់ទៀត ជាមន្ដ្រីនៅអគ្គនាយកដ្ឋានអន្ដោប្រវេសន៍ ពាក់ព័ន្ធការអន្ដរាគមន៍ដោះលែងជនជាតិចិន ១៨នាក់ ដែលប្រព្រឹត្តបទល្មើស(សង្ស័យថាជាក្រុមចាប់ជំរិតទារប្រាក់តាមប្រព័ន្ធអ៊ីនធ័រណេត) នៅខេត្តកំពង់ស្ពឺ ។
ប្រភពពីមន្ដ្រីនគរបាល បានឲ្យដឹងថា មន្ដ្រីនគរបាលទាំង៣រូប ដែលត្រូវចាប់ និងបញ្ជូនខ្លួនទៅតុលាការនៅព្រឹកថ្ងៃទី២១ ខែកក្កដា ឆ្នាំ២០១៩នេះ មាន២នាក់ នៅអគ្គនាយកដ្ឋានអត្តសញ្ញាណកម្ម (ឋានន្ដរស័ក្ដិ ឧត្តមសេនីយ៍ និងវរសេនីយ៍ត្រី) និងម្នាក់ទៀតនៅការិយាល័យស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្ដោប្រវេសន៍ ។
ប្រភពព័ត៌មានដដែល បានអះអាងថា ជនជាតិចិន១៨នាក់នេះ ត្រូវកម្លាំងសមត្ថកិច្ចខេត្តកំពង់ស្ពឺ បង្ក្រាបបានកាលពីថ្ងៃទី១៧ ខែកក្កដា ឆ្នាំ២០១៩ ពាក់ព័ន្ធករណីជំរិតទារប្រាក់តាមប្រព័ន្ធអ៊ីនធ័រណេត ប៉ុន្ដែក្រោយមក មន្ដ្រីនគរបាលកម្ពុជាទាំង៣នាក់ ខាងលើនេះបានចេញមុខរត់ការដោះលែង រហូតដឹងដល់ថ្នាក់លើ ទើបឈានទៅការចាត់វិធានការតាមផ្លូវច្បាប់តែម្តង ។
សូមរម្លឹកថា កាលពីព្រឹកថ្ងៃទី១៧ ខែកក្កដា ឆ្នាំ២០១៩ យ៉ាងហោចណាស់មានជនជាតិចិនចំនួន១៨នាក់ (ចិនតៃវ៉ាន់១២នាក់) ដែលបានសំងំលាក់ខ្លួនក្នុងផ្ទះដាច់ស្រយាលមួយកន្លែង ត្រូវបានកម្លាំងនគរបាលខេត្តកំពង់ស្ពឺ ព័ទ្ធចាប់ខ្លួន ដោយមានការដឹកនាំនិងសម្របសម្រួលផ្លូវច្បាប់ ដោយលោក ខៃ សម្ជស្ស ព្រះរាជអាជ្ញារងនៃអយ្យការអមសាលាដំបូងខេត្តកំពង់ស្ពឺ ផងដែរ ។
បើយោងតាមការចុះផ្សាយរបស់ទំព័រហ្វេសប៊ុករបស់ស្នងការដ្ឋាននគរបាលខេត្តកំពង់ស្ពឺ បានបញ្ជាក់ថា ការចុះបង្ក្រាបជនជាតិចិនទាំង១៨នាក់នោះ ទីតាំងឃ្លាំងមួយកន្លែងដែលគេដឹងថា ជាកម្មសិទ្ធិរបស់លោកមេធាវី ហេ ជីវអេង នៅក្នុងដីចំការស្វាយ ស្ថិតនៅក្នុងភូមិចា ឃុំស្វាយចចឹប ស្រុកបរសេដ្ឋ ខេត្តកំពង់ស្ពឺ ។ ទីតាំងដែលជនជាតិចិនយកធ្វើជាមូលដ្ឋានប្រព្រឹត្តបទល្មើសចាប់ជំរិតនោះ ត្រូវបានម្ចាស់ដី ឈ្មោះ ហេ ជីវ អេង មុខរបរជាមេធាវី បានជួលទៅឲ្យឈ្មោះ រ័ត្ន ពិន្ទ ដែលជាតំណាងឈរឈ្មោះអោយបុគ្គលម្នាក់ទៀតមិនស្គាល់ឈ្មោះ ក្នុងតម្លៃ២.២០០០ដុល្លារក្នុងមួយខែ ។
នៅក្នុងប្រតិបត្តិការចុះបង្ក្រាបនោះ កម្លាំងនគរបាលបានដកហូតសម្ភារជាច្រើន និងឃាត់ខ្លួនចិនទាំង១៨នាក់យកទៅសាកសួរ ។ នគរបាលជំនាញខេត្តកំពង់ស្ពឺបានសម្រេចបញ្ជូនខ្លួនក្រុមជនសង្ស័យ ទាំង១៨នាក់ និងវត្ថុតាងពាក់ព័ន្ធបទល្មើសឆបោកជំរិតទារប្រាក់តាមប្រព័ន្ធបច្ចេកវិទ្យា VOIP ទៅអគ្គស្នងការដ្ឋាននគរបាលជាតិ ដើម្បីដំណើរការចាត់ការតាមនីតិវិធីបន្ដជាមួយភាគីនគរបាលនៃសាធារណរដ្ឋប្រជាមានិតចិន តាមច្បាប់ជាធរមាន ៕