រាជធានីភ្នំពេញ ៖ នាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ បានដាក់ចេញនូវបទបញ្ជាឲ្យនគរបាលចរាចរណ៍ទូទាំងប្រទេស ចាប់ផ្តើមចាត់វិធានការជំរុញការពាក់មួកសុវត្ថិភាពដល់អ្នកជិះទោចក្រយានយន្ត និងអ្នកបើកបរត្រីចក្រយានយន្តគ្រប់រូប ។
វិធានការនេះនឹងអនុវត្តនៅទូទាំងប្រទេស ចាប់ពីថ្ងៃទី១៩ ខែកក្កដា ឆ្នាំ២០១៩ ដោយធ្វើការឃាត់តម្រូវឲ្យរកមួកសុវត្ថិភាពមកពាក់ រួចទើបអនុញ្ញាតឲ្យបន្តដំណើរ ដោយមិនពិន័យរយៈពេល១ខែ គិតពីថ្ងៃទី១៩ កក្កដា នេះតទៅ ។
នៅថ្ងៃទី១៩ កក្កដា ២០១៩ នេះដែរ ស្នងការដ្ឋាននគរបាលរាជធានីភ្នំពញ បានជូនដំណឹងដល់អ្នកបើកបរ និងព្រូរថយន្តធំៗ ក៏ដូចជាម្ចាស់ក្រុមហ៊ុននិងសមាគមន៍ទាំងអស់ អោយបានជ្រាបថា ចាប់ពីថ្ងៃចន្ទទី២២ ខែកក្កដា ឆ្នាំ២០១៩ តទៅកម្លាំងនគរបាលចរាចរណ៍ផ្លូវគោក នឹងសហការជាមួយកម្លាំងតាមបណ្តាអធិការខណ្ឌនានា ដើម្បីចុះត្រួតពិនិត្យសារធាតុញៀន និងជាតិស្រវឹង ចំពោះអ្នកបើកបរ និងព្រូរថយន្តធំទាំងអស់ ។
ការត្រួតពិនិត្យនេះ នឹងធ្វើតាមគ្រប់ច្រក ចេញចូលធំៗ ក្នុងរាជធានីភ្នំពេញ ក្នុងករណីត្រួតពិនិត្យរកឃើញអ្នកបើកបរ ឬព្រូមានពាក់ព័ន្ធនឹងសារធាតុញៀន ឬជាតិស្រវឹង សមត្ថកិច្ចនឹងឃាត់រថយន្តទុក ហើយបញ្ជូនអ្នកបើកបរ និងព្រូ ទៅអនុវត្តតាមនីតិវិធីច្បាប់ ៕