ក្រចេះ ៖ មន្ត្រីកាំកុងត្រូលខេត្តក្រចេះ សហការជាមួយអាជ្ញាធរ និងមន្ទីរពាណិជ្ជកម្មខេត្ត បានចុះត្រួតពិនិត្យមុខទំនិញម្ហូបអាហារ បន្លែ ភេសជ្ជៈ នៅផ្សារសំបូរ និងផ្សារសាម្គីសណ្ដាន់ ដោយរកឃើញទំនិញខូចគុណភាពនិងហួសកាលបរិច្ឆេទជាច្រើនមុខ ត្រូវបានក្រុមការងារបានដកហូតយកទៅបំផ្លាញចោល ។
ការចុះត្រួតពិនិត្យនេះធ្វើឡើងនៅព្រឹកថ្ងៃទី១៩ ខែកក្ដដា ឆ្នាំ២០១៩នេះ ស្ថិតនៅផ្សារសំបូរ និងផ្សារសាម្គីសណ្ដាន់ ក្នុងស្រុកសំបូរ ខេត្តក្រចេះ ។
លោក យាង បាក អនុប្រធានសាខាកាំកុងត្រូលខេត្តក្រចេះ បានឲ្យដឹងថា ការចុះត្រួតពិនិត្យទៅលើមុខទំនិញជាច្រើនប្រភេទ ក្នុងនោះនៅផ្សារសំបូរ មន្ត្រីរកឃើញសាធាតុ Salicylic Acid នៅក្នុងជ្រក់ស្ពៃចំនួន១៣គីឡូក្រាម និងបានរកឃើញសារធាតុ ដែលហាមឃាត់មានឈ្មោះសូដ្យូមអ៊ីដ្រូស៊ីលសូហ្វីត (Sodium Hydrosulfite) នៅក្នុងស្ករត្នោតចំនួន២៦គីឡូក្រាម ត្រូវបានដកហូតយកទៅបំផ្លាញចោល ។
លោកអនុប្រធាន បញ្ជាក់ទៀតថា សារធាតុ Salicylic Acid (អាស៊ីតសាលីស៊ីលិច) ជាសារធាតុគីមីអាចបង្កគ្រោះថ្នាក់ដល់សុខភាព ។ វាជាសារធាតុគីមី ត្រូវបានគេហាមឃាត់សម្រាប់ប្រើ ជាមួយសារធាតុបន្ថែម ក្នុងផលិតផលម្ហូបអាហារ ប៉ុន្តែគេសង្កេតឃើញថា នៅលើទីផ្សារបច្ចប្បន្ន មានប្រើប្រាស់សារធាតុនេះ ក្នុងផលិតផលអាហារជាច្រើន ។ ចំពោះសារធាតុ Sodium Hydrosulfite (ម្សៅស) វិញជាសារធាតុគីមីអាចបង្កគ្រោះថ្នាក់ដល់សុខភាព ដូចគ្នា វាជាសារធាតុគីមី ដែលអ្នកបានដាក់បន្ថែម ក្នុងផលិតផលអាហារ ធ្វើឲ្យអាហារមានភាពស្រស់បានយូ មិនឆាប់ជាំខ្មៅ បាត់សោភ័ណ្ឌភាព ។ ប៉ុន្តែសារធាតុនេះ ត្រូវបានគេហាមឃាត់មិនឲ្យប្រើក្នុងផលិតផលម្ហូបអាហារនោះ ព្រោះវាមានផលប៉ះពាល់ដល់សុខភាព អាចបណ្ដាលឲ្យពិបាកដកដង្ហើម សម្ពាធឈាមចុះទាប វិលមុខ ឈឺពោះ ក្អួតចង្អោរ និងរាគរូស ។ សម្រាប់អ្នកទាស់ចំណីអាហារធ្ងន់ធ្ងរ ឬអ្នកជំងឺដែលមានរោគហឺត វាអាចបណ្ដាលឲ្យរន្ធត់ញាប់ញ័រ ភ្លឹកស្មារតី និងអាចស្លាប់បាន ៕
