ស្ពៃក្រញាញ់ ជាដំណាំស្លឹកដែលអាចដាំដុះបានគ្រប់រដូវ ហើយឆាប់ទទួលបានផលតែកសិករខ្មែរយើងនិយមដាំដុះច្រើន និងល្អបំផុត គឺនៅរដូវរំហើយ ចាប់ពីខែតុលា វិច្ឆិកា និងធ្នូ ។ ស្ពៃក្រញាញ់ ដែលភាគច្រើនគេយកវាទៅធ្វើម្ហូបដូចជា ឆា ស្ងោរ ឬធ្វើជាអន្លក់ស្រស់ ជាដើម ។
១/.ការជ្រើសរើសពូជ ៖
– ត្រូវរើសពូជដែលមានប្រវត្តិច្បាស់លាស់
– គ្រាប់ពូជ ដែលអាចដុះបានចាប់ពី៨០%ឡើងទៅ
– គ្រាប់ពូជមានសុខភាពល្អ ថ្លោសល្អ មិនស្វិត គ្មានការប្រេះស្រាំ
– ពូជលូតលាស់រយៈពេលខ្លី ស្របនឹងតំបន់ដាំដុះ
២/.ការរៀបចំដី ៖
ក. ការភ្ជួរ ឬកាប់
– ភ្ជួរឬកាប់ដីជម្រៅ ២ – ២,៥ តឹក
– ហាលដី ៧ – ១០ ថ្ងៃ នៅរដូវប្រាំង
– ហាលដី ១០ – ៣០ ថ្ងៃ នៅរដូវវស្សា
ខ. ការរៀបចំថ្នាលនិងរង
– ទទឹងរង ១ម៉ែត្រ បណ្តោយចំណង់ចង់បាន
– កម្ពស់ ១ – ១,៥ តឹក នៅរដូវប្រាំង
– កម្ពស់ ២ – ២,៥ តឹក នៅរដូវវស្សា
– ចន្លោះរង ២,៥ – ៣ តឹក
៣/.ការដាំដុះ ៖
ក. ការសាប
– មុនពេលសាបកូន ត្រូវរៀបចំថ្នាល ជ្រុំជ្រួយដី រាស់កៀ ឱ្យស្មើលើករងបានល្អ
– ដាក់ជីកំប៉ុស្ត ឬលាមកសត្វ ៤-៨បង្គី និងជី ១៥,១៥,១៥ ចំនួន ១០០-១៥០ក្រាម (ក្នុងដី១០ម៉ែត្របួនជ្រុង)
– ស្រោចទឹកនៅលើថ្នាលមុនពេលសាបគ្រាប់
– សាបស្តើងៗ ហើយកាត់ចំបើងខ្លីៗ គ្របពីលើរង រួចស្រោចទឹកម្តងទៀត
– ស្រោចទឹកឱ្យបាន២ដង ក្នុង១ថ្ងៃ (ព្រឹក និងល្ងាច)
ខ. ការដាំ
– នៅពេលវាមានអាយុ ១០ – ១៥ ថ្ងៃ យើងអាចដកយកវាទៅដាំបានហើយ តែមុននឹងដក ត្រូវបន្ថយការស្រោចកូនស្ពៃពី ២ – ៣ថ្ងៃ ដើម្បីឱ្យដើមវារឹង ។ ស្រោចទឹកលើថ្នាលឱ្យសើមងាយស្រួលក្នុងការដកកូន ។ ដកកូនណាដែលមានដើមធំ ស្មើគ្នា ដាក់ក្នុងកញ្ជើ ហ៊ុស្លឹកចេក ។ ត្រូវស្រោចទឹកលើរងឱ្យជោគល្អមុនពេលដាំ ។ ការដាំត្រូវដាក់ឫសមួយជំហរ កុំឱ្យច្បត់ឫសឱ្យសោះ ចន្លោះជួរពី ២-២,៥តឹក និងចន្លោះគុម្ព ២,៥តឹក ។
– ត្រូវកាត់ចំបើងខ្លីៗ គ្របតាមគល់ស្ពៃ ដើម្បីរក្សាសំណើមដីបានល្អ នៅរដូវប្រាំង ។ ស្រោចទឹកនៅលើរង ដែលដាំរួចឱ្យជោគ គ្របកូនស្ពៃពី២-៣ថ្ងៃ ដើម្បីការពារកម្តៅថ្ងៃខ្លាំង ។
៤/.ការថែទាំ ៖
ក. ការស្រោចស្រព
– ស្រោចទឹកពី៣ – ៤ដង ក្នុងមួយថ្ងៃ ក្រោយពីដាំបាន៣ – ៤ថ្ងៃដំបូង (និងនៅរដូវប្រាំង)
– នៅរដូវវស្សា ស្រោចទឹកពេលព្រឹក និងល្ងាច បើភ្លៀងខ្លាំង មានទឹកដក់តាមរង ត្រូវបង្ហូរទឹកចេញ ដើម្បីកុំឱ្យដំណាំរលួយខូច
– ៧ – ៨ថ្ងៃ ក្រោយស្ទូង ដកស្មៅចេញអាស្រ័យនឹងការដុះ ក្នុងរងផ្ទាល់ ត្រូវធ្វើដោយដៃ ឬដោយចបជីក
ខ. វិធានការការពារ
– ដាំដំណាំចម្រុះ កុំដាំដំណាំតែមួយមុខ
– ដាំស្លឹកគ្រៃ ផ្កាស្បៃរឿង ស្នោគោកតាមរបងសួនបន្លែ
– កម្ចាត់ដោយដៃពេលសត្វល្អិតតិចតួច ប្រើថ្នាំគីមីពេលសត្វល្អិតមានច្រើន ប្រើម៉ាឡាចុង ៤ ស្លាបព្រាបាយ លាយទឹក២០លីត្រ បាញ់ឱ្យសព្វល្អ (ចំពោះសត្វចៃ)
– ប្រើមេតាផុស ៣០សេសេ លាយទឹក២០លីត្រ បាញ់ឱ្យសព្វល្អ (ចំពោះដង្កូវយោងទោង)
៥/.ការប្រមូលផល ៖
– សាបផ្ទាល់ អាចប្រមូលផលពី៣០-៣៣ ថ្ងៃ
– សាបដកកូនដាំ ប្រមូលផលពី ៣៦-៤០ ថ្ងៃ។
ស្ពៃក្រញាញ់ ជាដំណាំដែលងាយស្រួលដាំ មិនចំណាយថវិការច្រើន ហើយជាពិសេសដំណាំនេះកំពុងមានទីផ្សារចរាចរខ្ពស់លើទីផ្សារទៀតផង ដែលធ្វើអ្នកដាំមិនពិបាករកទីផ្សារក្នុងការនាំចេញ ៕