ភ្នំពេញ ៖ លោកឧត្តមសេនីយ៍ត្រី អេង ហ៉ី អ្នកនាំពាក្យគណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ បានថ្លែងថា ពេលនេះសមត្ថកិច្ចកំពុង តាមស្វែងរកជនសង្ស័យពាក់ព័ន្ធចំនួន៩នាក់ទៀតកំពុងគេចខ្លួន ខណៈដែលឈើខុសច្បាប់ចំនួន១៧០០ម៉ែត្រគូប ត្រូវបង្ក្រាបបាន ។
ការលើកឡើងរបស់លោក អេង ហ៊ី ខាងលើនេះធ្វើឡើងនៅក្នុងសន្និសីទសារព័ត៌មានប្រចាំសប្តាហ៍ ស្តីពី «វិធានការទប់ស្កាត់បទល្មើសព្រៃឈើ» រៀបចំដោយអង្គភាពអ្នកនាំពាក្យរាជរដ្ឋាភិបាល នៅទីស្តីការគណៈរដ្ឋមន្ត្រី នាព្រឹកថ្ងៃទី១៨ ខែកក្កដា ឆ្នាំ២០១៩ នេះ ។
អ្នកនាំពាក្យកងរាជអាវុធហត្ថ បានបញ្ជាក់ថា យុទ្ធនាការបង្ក្រាបបទល្មើសព្រៃឈើ នៅខេត្តមណ្ឌលគិរី ចាប់ពីថ្ងៃទី០៩ ដល់ថ្ងៃទី១៧ ខែកក្កដា ឆ្នាំ២០១៩ គណៈកម្មការជាតិ បានរឹបអូសឡានដឹកឈើជាង៤០គ្រឿង ជនល្មើស៤នាក់ ត្រូវបានចាប់ខ្លួន ហើយតុលាការ បានចោទប្រកាន់ និងសម្រេចឃុំខ្លួន នៅពន្ធនាគារ ។ ក្នុងនោះ បុគ្គលពាក់ព័ន្ធបទល្មើសព្រៃឈើនេះ មាន ៩នាក់ ហើយកំពុងគេចខ្លួន ដែលតុលាការខេត្តមណ្ឌលគិរី បានចេញដីកាតាមចាប់ខ្លួន ក្នុងនោះមានមនុស្ស៣នាក់ ក៏ត្រូវបានតុលាការ ចេញដីកាកោះហៅផងដែរ ។ ជាមួយគ្នានេះដែរ បទល្មើសព្រៃឈើនៅខេត្តមណ្ឌលគិរី មានក្រុមហ៊ុនចំនួន៦ ជាប់ពាក់ព័ន្ធ លោកលែងក្រុមហ៊ុន លឹម រ៉ូយ៉ាល់ មិនពាក់ព័ន្ធទេ ។
ទន្ទឹមនឹងការចាប់បង្ក្រាបបទល្មើសព្រៃឈើនេះ កម្លាំងជំនាញក៏បានបំផ្លាញរថយន្តមណ្ឌលគិរី ចំនួន ២១គ្រឿង នៅខេត្តរតនគិរី ចំនួន ២គ្រឿង និងនៅខេត្តស្ទឹងត្រែង មាន ៦គ្រឿង ។ ចំពោះរថយន្តដឹកឈើនៅក្នុងព្រៃឈើ មានប្រើម្ស៉ៅ TNT បំផ្ទុះកម្ទេចឡានទាំងនោះ នៅក្នុងព្រៃ ហើយឡានឡង់គ្រឹស័រ ២គ្រឿង នៅខេត្តរតនគិរី និងនៅខេត្តស្ទឹងត្រែង គឺមន្ត្រីជំនាញ ដុតបំផ្លាញតែម្តង ៕
