រាជធានីភ្នំពេញ ៖ បុរសម្នាក់បានបើករថយន្តម៉ាក RAV4 គោលបំណងយកអីវ៉ាន់ទៅផ្ញើនៅទល់មុខវិទ្យាល័យបាក់ទូក ខណៈចុះពីលើរថយន្ត មិនបានដកសោរ ព្រមទាំងមិនពន្លត់ម៉ាស៊ីនថែមទៀត ស្រាប់តែមានជនសង្ស័យម្នាក់ ឃើញឱកាសល្អ ក៏លួចចូលបើករថយន្ត ចេញទៅបាត់
បង្កការភ្ញាក់ផ្អើលសុំឱ្យសមត្ថកិច្ចជួយអន្តរាគមន៍កាលពីវេលាម៉ោង៨យប់ ថ្ងៃទី១៧ ខែកក្កដា ឆ្នាំ២០១៩ ស្ថិតក្នុងសង្កាត់វាលវង់ ខណ្ឌ៧មករា ក្រុងភ្នំពេញ ។
បុរសម្ចាស់រថយន្ត មានឈ្មោះ ជៀប ចន្ថា អាយុ៤៤ឆ្នាំ មានមុខរបបអ្នកបើករថយន្ត ស្នាក់នៅក្នុងសង្កាត់ស្ទឹងមានជ័យ៣ ខណ្ឌមានជ័យ រាជធានីភ្នំពេញ ។ បុរសរងគ្រោះ បានប្រាប់ឲ្យដឹងថា រូបគាត់បានបើករថយន្តម៉ាក RAV4 ពណ៌ទឹកប្រាក់ពាក់ស្លាកលេខភ្នំពេញ 2AP 7017 ក្នុងគោលបំណងយកអីវ៉ាន់ទៅផ្ញើនៅទល់មុខវិទ្យាល័យបាក់ទូក ស្ថិតក្នុងសង្កាត់វាលវង់ ខណ្ឌ៧មករា ប៉ុន្តែដោយសារតែរថយន្តរបស់គាត់មានភ្ជាប់ប្រព័ន្ធ GPS ទើបសមត្ថកិច្ចធ្វើការស្រាវជ្រាវឈានដល់ចំណុចគល់ស្ពានអាកាស៥មករា ស្ថិតក្នុងសង្កាត់ផ្សារដេប៉ូ៣ ខណ្ឌទួលគោក ក៏រកឃើញរថយន្តដែលជនសង្ស័យប្លុងទុកចោល ក្នុងផ្ទះចាស់មួយកន្លែង ដែលគេទុកចោល ចំណែកជនសង្ស័យ បានគេចខ្លួនបាត់ ។
ក្រោយមកសមត្ថកិច្ចជំនាញបានយករថយន្ត និងម្ចាស់ទៅធ្វើឯកសារនៅអធិការដ្ឋាននគរបាលខណ្ឌ៧មករា ដើម្បីប្រគល់រថយន្តឲ្យទៅម្ចាស់វិញ ៕