ភ្នំពេញ ៖ ឧត្តមសេនីយ៍ឯក ស ថេត ស្នងការនគរបាលរាជធានីភ្នំពេញ បានដាក់បទបញ្ជា មិនអនុញ្ញាតអោយមន្ត្រីនគរបាលណាម្នាក់ ទៅបំពេញការងារក្រៅឡើយ ពោលគឺកន្លងមក មានមន្ត្រីនគរបាលមួយចំនួនតូច ឆ្លៀតទៅយាមតាមក្លឹបកម្សាន្ត ។
ថ្លែងទៅកាន់កងកម្លាំង នៃស្នងការដ្ឋាននគរបាលរាជធានីភ្នំពេញ នៅថ្ងៃទី១៥ ខែកក្កដា ឆ្នាំ២០១៩ ពេលគោរពទង់ជាតិដូចសព្វមួយដងដែលមានមន្ត្រីជាង៨០០នាក់ លោកស្នងការនគរបាលរាជធានីភ្នំពេញ បានបញ្ជាក់ថា មន្ត្រីនគរបាលមិនត្រូវពាក់ព័ន្ធនឹងគ្រឿងញៀន និងមិនអនុញ្ញាតអោយមានវត្តមានមន្ត្រីនគរបាលទៅយាម ឬការពារក្លិបណាមួយឡើយ ។
ជាមួយគ្នានេះ ឧត្តមសេនីយ៍ឯក ស ថេត បានណែនាំឲ្យកម្លាំងនគរបាលទាំងអស់ ត្រូវមកគោរពទង់ជាតិ ពិសេសត្រូវស្លៀកពាក់ឲ្យបានត្រឹមត្រូវ តាមឯកសណ្ឋានរបស់នគរបាល ត្រូវកាត់សក់ខ្លី ហើយដំបូងនេះគឺកម្លាំងនគរបាលចរាចរណ៍ និងកម្លាំងនគរបាលទេសចរណ៍ ត្រូវកាត់សក់មុនគេ ។ ហើយកងកម្លាំងនគរបាលអន្តរាគមន៍ ត្រូវតែនាំគ្នាហាត់ប្រាណជាប្រចាំ នៅពេលល្ងាច ដើម្បីសុខភាពផង និងដើម្បីឲ្យរាងកាយមាំមួនផង ។ ៕