ភ្នំពេញ ៖ មន្ត្រីជំនាញរបស់ក្រសួងកសិកម្ម រុក្ខាប្រមាញ់ និងនេសាទ បានប្រកាសក្នុងសន្និសីទសារព័ត៌មាន ស្ដីពី “បញ្ហាផ្ទុះជំងឺប៉េស្តជ្រូក” រៀបចំដោយអង្គភាពអ្នកនាំពាក្យរាជរដ្ឋាភិបាល នាព្រឹកថ្ងៃទី១១ ខែកក្កដា ឆ្នាំ២០១៩ ថា គិតមកដល់ថ្ងៃនេះ នៅកម្ពុជាយើង ជំងឺប៉េស្តជ្រូក បានកើតឡើង នៅ៤ខេត្ត គឺខេត្តរតនគិរី ត្បូងឃ្មុំ ស្វាយរៀង និងខេត្តតាកែវ ។
កម្ពុជាបានឆ្លងជំងឺប៉េស្ដជ្រូកអាហ្វ្រិកដំបូង កាលពីថ្ងៃទី ២២ ខែ មីនា នៅស្រុកអូរយ៉ាដាវ និងស្រុកអូរជុំខេត្តរតនគិរី ដោយមានជ្រូកជាង ២,១៤០ ក្បាល ត្រូវបានសម្លាប់ចោល និងងាប់ មុនពេលជំងឺនេះបន្តរាលដាលដល់ខេត្តត្បូងឃ្មុំ ដែលបានធ្វើឱ្យជ្រូក ៣ ក្បាល ងាប់កាលពីថ្ងៃ ២៣ មិថុនា មុនឆ្លងចូលមកដល់ខេត្តតាកែវ និងខេត្តស្វាយរៀងនាពេលនេះ ។
មន្ត្រីជំនាញ បញ្ជាក់ថា ជំងឺប៉េស្តជ្រូក ដែលកំពុងរាលដាលនៅក្នុងប្រទេសកម្ពុជាយើង ជាប្រភេទមេរោគ កម្រិតលេខ២ ដែលគ្រោះថ្នាក់ខ្លាំង ។ ជំងឺនេះ បណ្តាលឲ្យជ្រូកឈឺងាប់ ហើយឆ្លងរាលដាលឆាប់រហ័ស ។ យ៉ាងណាក៏ដោយ ជំងឺប៉េស្តជ្រូកនេះ មិនឆ្លងដល់មនុស្សទេ បើសិនជាចំណីបានត្រឹមត្រូវ ។
ក្រសួងកសិកម្ម រុក្ខាប្រមាញ់និងនេសាទ ទើបប្រកាសដាក់ចេញវិធានការផ្អាកបណ្ដោះអាសន្ន ការចិញ្ចឹម ទិញ លក់ និងដឹកជញ្ជូនសត្វជ្រូកនិងផលិតផលមានដើមកំណើតពីសត្វជ្រូកគ្រប់ប្រភេទនៅតំបន់ផ្ទុះជំងឺគឺក្នុងភូមិកំពង់សេរីនិងភូមិសោយ ឃុំមៀន ស្រុកអូររាំងឪ ខេត្តត្បូងឃ្មុំកាលពីថ្ងៃទី ២ ខែ កក្កដា កន្លងមក ខណៈក្រសួងបានបញ្ជាក់ថា ថ្វីដ្បិតជំងឺនេះមិនមានថ្នាំព្យាបាលឱ្យជា ប៉ុន្តែមិនអាចឆ្លងមកមនុស្សនិងធ្វើឱ្យប៉ះពាល់មនុស្សឡើយ។
ជាវិធានការ មន្ត្រីជំនាញរបស់កម្ពុជាយើង បានដុតជ្រូក ដែលឈឺងាប់ ព្រមទាំងចេញវិធានការជាក់ស្តែង ដោយចេញប្រកាស អប់រំផ្សព្វផ្សាយ សម្លាប់មេរោគ ហើយកម្ទេចសត្វជ្រូក នៅកន្លែងផ្ទុះ ដោយហាមឃាត់ការចរាចរណ៍សត្វនៅតំបន់ ដែលផ្ទុះជំងឺប៉េស្តជ្រូក ទាំង ៤ខេត្តនោះ គឺខេត្តរតនគិរី ខេត្តត្បូងឃ្មុំ ខេត្តស្វាយរៀង និងខេត្តតាកែវ ៕
#សូមជួយចែករំលែកឱ្យបងប្អូនយេីងបានដឹងអំពីជំងឺប៉េស្តជ្រូកអាហ្វ្រិកផង ???
