ខេត្តសៀមរាប ៖ មនុស្ស២នាក់ដែលបានធ្វើសកម្មភាពលួចគាស់កូនឈើប្រណីត ក្នុងតំបន់រមណីយដ្ឋានអង្គរ ត្រូវបានភ្នាក់ងារអភិរក្សព្រៃឈើ នៃនាយកដ្ឋានសណ្ដាប់ធ្នាប់ និងសហប្រតិបត្តិការរបស់អាជ្ញាធរជាតិអប្សរា ធ្វើការឃាត់ឃាត់ខ្លួន កាលពីថ្ងៃទី៦ កក្កដា ២០១៩ ស្ថិតនៅភូមិតាកុះ ឃុំព្រះដាក់ ស្រុកបន្ទាយស្រី ខេត្តសៀមរាប ។
បុរសដែលលួចគាស់ដើមឈើ មានឈ្មោះ ប្រាក់ រាម និងឈ្មោះ យោក យេន មានទីលំនៅ ភូមិតាកុះ ឃុំព្រះដាក ស្រុកបន្ទាយស្រី ខេត្តសៀមរាប ។
ភ្នាក់ងារអភិរក្សព្រៃឈើរបស់អាជ្ញាធរជាតិអប្សរា បានអោយដឹងថា ដើមឈើដែលត្រូវបានគេលួចគាស់ គឺជាប្រភេទឈើធ្នង់ ដែលមានទំហំមុខកាត់ ត្រង់គល់ប្រហែល១តឹក និងមានកម្ពស់៣ទៅ៤ម៉ែត្រ ចំនួន១៥ដើម ក្នុងនោះដែរ ភ្នាក់ងារអភិរក្សព្រៃឈើបានចាប់ឃាត់បានម៉ាស៊ីន ថាឡេថង១គ្រឿង យកទៅរក្សាទុកនៅនាយកដ្ឋានសណ្ដាប់ធ្នាប់ រង់ចាំម្ចាស់ចូលខ្លួនមកដោះស្រាយបន្ទាប់ ។
សូមជម្រាបថា ជនដែលលួចគាស់ដើមឈើ ត្រូវបានអាជ្ញាធរជាតិអប្សរាឲ្យធ្វើកិច្ចសន្យាបញ្ឈប់ការលួចគាស់ដើមឈើ និងដកហូតដើមឈើធ្នង់ រួចហើយឲ្យវិលត្រឡប់ទៅលំនៅដ្ឋានវិញ ៕