ភ្នំពេញ ៖ កាលពីព្រឹកថ្ងៃទី៦ ខែកក្កដា ឆ្នាំ២០១៩ សមត្ថកិច្ចជំនាញ នៃការិយាល័យបទល្មើសព្រហ្មទណ្ឌ កងរាជអាវុធហត្ថរាជធានីភ្នំពេញ បានបញ្ជូនជនសង្ស័យម្នាក់ទៅតុលាការដើម្បីធ្វើការផ្តន្ទាទោសតាមច្បាប់ពាក់ព័ន្ធករណីឆបោក ។
ជនសង្ស័យឈ្មោះ ជួង សេត ភេទប្រុស អាយុ២៧ឆ្នាំ មុខរបរមិនពិតប្រាកដ មានទីលំនៅបច្ចុប្បន្នផ្ទះជួលលេខ៦ សង្កាត់ទួលសង្កែ ខណ្ឌឫស្សីកែវ រាជធានីភ្នំពេញ ត្រូវបានកម្លាំងជំនាញអាវុធហត្ថរាជធានី សហការជាមួយកម្លាំងមូលដ្ឋាន អាវុធហត្ថខណ្ឌដូនពេញឃាត់ខ្លួន ក្នុងឯកសណ្ឋាន អាវយឺត អ.ហ ពណ៌ខ្មៅ និង ខោពណ៌ត្រេអ៊ី ព្រមទាំងដកហូតបាន អាយឌី ចំនួនមួយ គ្រឿង, កាំភ្លើងជ័រមួយដើម ពណ៌ខ្មៅដាក់ក្នុងស្រោម ។
ជនសង្ស័យបានតាំងខ្លួនថា ជាសមត្ថកិច្ចអាវុធហត្ថកូនចៅលោកឧត្តមសេនីយ៍ឯក រ័ត្ន ស្រ៊ាង ទៅបោកយកប្រាក់ពីជនរងគ្រោះចំនួនបួននាក់ ថារត់ការចូលក្របខណ្ឌ អាវុធហត្ថ ដោយម្នាក់ៗត្រូវបង់ប្រាក់ ចាប់ពី៤.០០០ ទៅ៥.០០០ដុល្លារ។ ជនរងគ្រោះទាំងបួននាក់ ក៏បានយល់ព្រមប្រគល់ប្រាក់ ជាបន្តបន្ទាប់ បានចំនួន ១៧.៦០០ដុល្លារ។ តែការពិតជនសង្ស័យ ពុំមែនជាសមត្ថកិច្ចអាវុធហត្ថសោះហើយអាវុធហត្ថក៏ពុំមាន ការបង់ប្រាក់ដើម្បីចូលក្របខណ្ឌនោះដែរ គឺមានតែការប្រឡងចូល នៅពេលណាមានការប្រកាសជ្រើសរើស ពីក្រសួងការពារជាតិប៉ុណ្ណោះ។
ក្រោមវិធានការជំនាញរបស់សមត្ថកិច្ចអាវុធហត្ថរាជធានីភ្នំពេញ ជនសង្ស័យបានសារភាពថាខ្លួនពិតជាបានប្រព្រឹត្តនូវ អំពើទុច្ចរិកនេះពិតប្រាកដមែន ដោយក្នុងដើមឆ្នាំ២០១៨ រូបខ្លួនបានកុហកទៅឈ្មោះ ឈន ឌី ថារូបខ្លួនគឺជា អាវុធហត្ថក្រុងកូនចៅឯកឧត្ដមរ័ត្នស្រ៊ាងហើយរូបខ្លួនបានសួរទៅជនរងគ្រោះថាចង់ចូលធ្វើការជាកងរាជអាវុធហត្ថរាជធានីភ្នំពេញដែរឬអត់ ? ហើយឈ្មោះ ឈន ឌី បានប្រាប់វិញថាគេចង់ចូលនិងមានមិត្តភក្តិចំនួនបីនាក់:១.ឈ្មោះ ជា ទូ ភេទប្រុស, ២.ឈ្មោះ សន សិទ្ធ ភេទប្រុស និង ៣.ឈ្មោះ សេង រំដោះ ភេទប្រុស ក៏ចង់ចូលធ្វើការងារក្របខ័ណ្ឌអាវុធហត្ថដែរ ។ បន្ទាប់មកជនសង្ស័យ ក៏បានណាត់ជនរងគ្រោះ ទាំងបួននាក់ មកជាមួយគ្នា ដោយពេលទៅជួបពួកគេទាំងបួន នាក់គឺជនសង្ស័យបានស្លៀកពាក់ ឯកសណ្ផានជាមន្ត្រីអាវុធហត្ថ ហើយបានបញ្ចុះបញ្ចូលជនរងគ្រោះទាំងបួននាក់ ឲ្យបង់ប្រាក់ម្នាក់៤.០០០ដុល្លារ (បួនពាន់ដុល្លារ) ដើម្បីរត់ការឲ្យបានឈ្មោះ ចូលក្របខ័ណ្ឌកងរាជអាវុធហត្ថ និងទារបន្ថែមជាបន្តបន្ទាប់ រហូតសរុបបានចំនួន ១៧.៦០០ដុល្លារ(មួយម៉ឺនប្រាំពីរពាន់ប្រាំមួយរយ ដុល្លារ)។
នៅទីបំផុត ជនរងគ្រោះម្នាក់ មានការសង្ស័យ ក៏មកដាក់ពាក្យបណ្តឹងនៅអាវុធហត្ថរាជធានីភ្នំពេញ ដើម្បីជួយស្រាវជ្រាវ រហូតឈានដល់ធ្វើការបង្ក្រាបនិងឃាត់ខ្លួនជនសង្ស័យតែម្តង ៕
