ខេត្តព្រះសីហនុ ៖ វាពិតជាមានការភ្ញាក់ផ្អើលយ៉ាងខ្លាំង ឯកឧត្តម គួច ចំរើន ចូលកាន់តំណែងជាអភិបាលខេត្តព្រះសីហនុមិនទាន់បានប៉ុន្មានថ្ងៃផង បានរកឃើញដេប៉ូលក់ខ្សាច់មួយចំនួននៅក្នុងខេត្តព្រះសីហនុ ដែលក្រុមឈ្មួញអ្នករកស៊ីលក់ខ្សាច់ទាំងនោះ បានយកខ្សាច់សមុទ្រ មកលាយជាមួយខ្សាច់កំពង់ស្ពឺ (ខ្សាច់ពីទន្លេឫពីស្ទឹង) លក់ឱ្យអតិថិជនយកទៅធ្វើសំណង់ ដែលនាំអោយសំណង់មិនមានគុណភាពល្អឡើយ ។
ដែលអ្នកជំនាញបានលើកឡើងថា ធ្វើឱ្យសំណង់មិនមានគុណភាពល្អឡើយ ព្រោះថាខ្សាច់ពីទន្លេ,ស្ទឹង និង ខ្សាច់សមុទ្រ មានគុណភាពខុសគ្នា ដោយខ្សាច់សមុទ្រមានជាតិប្រៃខុសពីខ្សាច់សុទ្ធកំពង់ស្ពឺ ដែលគេមិនអាចយកទៅធ្វើសំណង់បានឡើយ ។
មន្ត្រីរដ្ឋបាលសាលាខេត្ត អោយដឹងថា ឯកឧត្តមគួច ចំរើន អភិបាលខេត្តព្រះសីហនុ បានលើកយកបញ្ហា អំពីការដ្ឋានសំណង់មួយចំនួន ដែលយកខ្សាច់សមុទ្រ មកលាយជាមួយខ្សាច់សុទ្ធពីខេត្តកំពង់ស្ពឺ ដាក់ជាបញ្ហាប្រឈមដ៏សំខាន់ ។
មន្ត្រីដដែលដកស្រង់ប្រសាសន៍របស់ឯកឧត្តមអភិបាលខេត្ត មកបញ្ជាក់ថា ករណីនេះឯកឧត្តមអភិបាលខេត្តព្រះសីហនុ តម្រូវអោយក្រុមការងារបច្ចេកទេស ធ្វើការសិក្សាអំពីផលប៉ះពាល់ពីការយកខ្សាច់សមុទ្រ មកលាយជាមួយខ្សាច់សុទ្ធពីខេត្តកំពង់ស្ពឺនេះ នៅតាមការដ្ឋានសំណង់នានា ដែលពាក់ពន្ធ័ក្នុងក្រុងព្រះសីហនុ ជាការប្រញាប់ ដើម្បីមានវិធានការបន្ត ៕