ភ្នំពេញ ៖ បន្ទាប់ពីរូបភាពវីដេអូ បង្ហាញពីលោកជា ពិសី ដេកលក់លើកៅអ៊ី ក្នុងទិវាគ្រឿងញៀន នៅកោះពេជ្រ កាលពីថ្ងៃទី២៦ ខែមិថុនា ម្សិលមិញ ត្រូវបានចែកចាយលើបណ្តាញសង្គមហ្វេសប៊ុករួចមក នៅរសៀលថ្ងៃទី២៧ មិថុនានេះ លោកជា ពិសី អភិបាលខណ្ឌឫស្សីកែវ បានចេញមកបកស្រាយថា មកពីលោកអត់ងងុយខ្លាំងពេក មិនអាចទ្រាំបានក៏សំងំមួយសន្ទុះ ដោយសារតែជាប់កំដម្ដាយរបស់លោកឈឺធ្ងន់ ហើយម្យ៉ាងទៀត ដោយសារលោកមានបញ្ហាសុខភាពថែមទៀត ។
យោងតាមរយៈគណនីហ្វេសប៊ុកផ្លូវការរបស់លោកជា ពិសី អភិបាលខណ្ឌឬស្សីកែវ បានសរសេរសារយ៉ាងដូច្នេះថា «កាលពីថ្ងៃ២៦ ខែមិថុនា ឆ្នាំ២០១៩ម្សិលមិញ Page Facebook មួយចំនួន បានបង្ហោះ រូបភាព និង វីឌីអូ អំពីខ្ញុំ គ្រាដែលខ្ញុំបាទបានបិទភ្នែភ សំងំមួយសន្ទុះ ដោយសារភាពអស់កម្លាំង បូករួមទាំងបញ្ហាសុខភាពផ្ទាល់ខ្លួនផងនោះ ក្នុងទិវាប្រយុទ្ធប្រឆាំងគ្រឿងញៀនកាលម្សិលមិញនៅកោះពេជ្រ ដោយបានបង្ហោះចែកចាយក្នុងបណ្តាញសង្គម ។
ខ្ញុំបាទសូមឆ្លើយតប និងបកស្រាយជូន សាធារណៈមតិមេត្តាជ្រាបថា ៖ ប៉ុន្មានថ្ងៃមកនេះ ម្ដាយជរារបស់ខ្ញុំ អាយុ ៨០ឆ្នាំ កំពុងមានជំងឺជាទម្ងន់ និងកំពុងសម្រាកព្យាបាល នៅឯមន្ទីរពេទ្យ ។ កាតព្វកិច្ចដ៏ធំបំផុតរបស់ខ្ញុំ ក្នុងនាមជាកូនកតញ្ញូមួយរូប ខ្ញុំតែងតែទៅមើលថែទាំម្ដាយរបស់ខ្ញុំ ស្ទើរតែរៀងរាល់យប់ក្រោយបានសម្រាកពីការដឹកនាំការងាររដ្ឋបាលរួចមក ។
គាប់ជួន នៅយប់ថ្ងៃទី២៥ ខែមិថុនា កន្លងមកនេះ ខ្ញុំបាទ បានទៅមើលថែម្ដាយជរា ឈឺធ្ងន់ រហូតដល់ម៉ោងជាង២យប់រំលោងអាធ្រាតថ្ងៃទី២៦ ខែមិថុនា ទើបនឹងបានសម្រាកប៉ុន្មានម៉ោងប៉ុណ្ណោះ នៅក្នុងថ្ងៃដដែលនោះ វេលាម៉ោង៥ព្រឹក ខ្ញុំបាទត្រូវក្រោក ពីព្រឹកព្រលឹម ដើម្បីទៅដឹកនាំកម្លាំងមហាជន ចូលរួម កម្មវិធី នៅឯកោះពេជ្រទៀត ។
ខ្ញុំបាទសូមការអធ្យាស្រ័យពីសាធារណៈមតិទូទាំងប្រទេស ពិសេស ខ្ញុំបាទ សូមការអភ័យទោសដ៏ខ្ពង់ខ្ពស់ពី ថ្នាក់ដឹកនាំគ្រប់ជាន់ថ្នាក់ ចំពោះកាយវិការមិនសមរម្យក្នុងអង្គពិធី កាលពីម្សិលមិញ ដោយអចេតនានេះ ដោយសារតែបញ្ហាសុខភាពផ្ទាល់ខ្លួនរបស់ខ្ញុំបាទ ។ សូមអរគុណសម្រាប់ការដាស់តឿនក្នុងន័យស្ថាបនា» ។
នៅព្រឹកថ្ងៃពុធ ៩រោច ខែជេស្ឋ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី២៦ ខែមិថុនា ឆ្នាំ២០១៩នេះ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ តំណាងដ៏ខ្ពង់ខ្ពស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា បានអញ្ជើញជាអធិបតី ទិវាអន្តរជាតិប្រយុទ្ធប្រឆាំងគ្រឿងញៀន ប្រារព្ធនៅសាលមហោស្រពកោះពេជ្រ ៕
