ភ្នំពេញ ៖ បន្ទាប់ពីសារព័ត៌មានក្នុងស្រុកបានចុះផ្សាយនៅថ្ងៃម្សិលមិញនេះថា ព្រះចៅអធិការវត្តពោធិ៍ចិនតុង បានគេចព្រះកាយពីវត្តបាត់ហើយ ក្រោយបែកធ្លាយរឿងអាស្រូវកេរ្តិ៍និងរូបភាពជាច្រើនសន្លឹកជាមួយស្ត្រីម្នាក់នោះ នៅថ្ងៃទី២៦ មិថុនា នេះ មន្ទីរធម្មការ និងសាសនារាជធានីភ្នំពេញ បានជូនដំណឹងដល់សាធារណជនជ្រាបថា ព្រះអង្គចៅអធិការកំពុងតែគង់ក្នុងវត្តជាធម្មតា ដដែលទេ ។
មន្ទីរធម្មការ និងសាសនារាជធានីភ្នំពេញ បានជូនដំណឹងតាមរយៈហ្វេសប៊ុកយ៉ាងដូច្នេះថា «ក្នុងនាមមន្ទីរធម្មការ និងសាសនារាជធានីភ្នំពេញ សូមជូនដំណឹងដល់សាធារណជនជ្រាបថា តាមបណ្តាញពត៌មានសង្គមមួយចំនួន ដែលបានចុះផ្សាយថា ព្រះចៅអធិការវត្តពោធិសត្ថារាម(វត្តពោធិ៍ចិនតុង) មិនបានគង់នៅក្នុងវត្តទេ គឺបានភៀសព្រះកាយចេញទៅក្រៅវត្តជាដើម តែតាមការពិតនៅពេលដែលក្រុមការងារនៃមន្ទីរធម្មការចុះពិនិត្យជាក់ស្តែងនៅក្នុងវត្ត គឺព្រះអង្គចៅអធិការកំពុងតែគង់ក្នុងវត្តជាធម្មតា ។ ជាពិសេស នៅថ្ងៃទី២៥ ខែមិថុនា ឆ្នាំ២០១៩ យើងបានពិនិត្យ និងតាមដានសកម្មភាពរបស់ព្រះអង្គ គឺព្រះអង្គបានធ្វើដឹកនាំ គ្រប់គ្រង និងធ្វើសកម្មភាពជាធម្មតា ដូចសព្វដងដដែល ។ ជាក់ស្តែងនៅថ្ងៃទី២៦ ខែមិថុនា ឆ្នាំ២០១៩ មន្ទីរធម្មការបាននិមន្តព្រះអង្គមកកាន់មន្ទីរ ដើម្បីសាកសួរបន្ថែមពីសកម្មភាពការងារផ្សេងៗក្នុងវត្ត ។ ដូច្នេះ សូមសាធារណជន ជ្រាបជាដំណឹង ។ ម្យ៉ាងទៀត សូមហាមដល់ជនឆ្លៀតឱកាសនិងក្រុមបណ្តាញសង្គមរកផលប្រយោជន៍ផ្ទាល់ខ្លួនមួយចំនួនតូច ត្រូវឈប់ជាបន្ទាន់ ចំពោះការបង្ហោះអ្វីដែលមិនពិត ធ្វើឲ្យប៉ះពាល់ដល់គុណតម្លៃព្រះសង្ឃខ្មែរ និងព្រះពុទ្ធសាសនាដែលជាសាសនារបស់រដ្ឋ ។ សូមអរគុណ!» ។
សូមរម្លឹកថា កាលពីថ្ងៃទី២៤ ខែមិថុនា ឆ្នាំ២០១៩ ក្រោយពីមានរូបថតជាច្រើនសន្លឹករបស់ ភិក្ខុ វ៉ាន វន្នី ព្រះចៅអធិការវត្តពោធិសត្ថារាម (ហៅពោធិ៍ចិនតុង) និងនារីម្នាក់ ត្រូវបានគេបង្ហោះនៅលើហ្វេសប៊ុក ធ្វើឲ្យមហាជនរិះគន់ជាខ្លាំងនោះ ព្រឹកនៅព្រឹកថ្ងៃទី២៤ មិថុនា អាជ្ញាធរ និងមន្ដ្រីសង្ឃបានបើកការប្រជុំបន្ទាន់មួយ តែយ៉ាងណា សាមីខ្លួនទាំង២ និងមន្ត្រីសង្ឃបានអះអាងថា ជារូបភាពកាត់តរបស់ជនខិលខូច មានបំណងបង្ខូចកេរ្តិ៍ឈ្មោះតែប៉ុណ្ណោះ ។
ក្នុងកិច្ចប្រជុំនោះ ភិក្ខុ វាន វន្នី បានបដិសេធថា រូបភាពដែលបានបង្ហោះតាមហ្វេសប៊ុកនេះ មិនមែនជារូបពិតទេ គឺត្រូវបានជនខិលខូចកាត់ត ដើម្បីបង្អួចកិត្តិយសរបស់ព្រះអង្គ និងតម្លៃព្រះពុទ្ធសាសនា។
ចំណែក កញ្ញា លប ធីតា ជាម្ចាស់រូបដែលត្រូវបានគេបង្ហោះលើហ្វេសប៊ុក និងរងការចោទប្រកាន់ថា ជាស្រីស្នេហ៍របស់ ភិក្ខុ វ៉ាន វន្នី បានអះអាងថា នាងពុំមានទំនាក់ទំនង អ្វីជាមួយសង្ឃវ៉ាន វន្នី ទេ ហើយរូបថតទាំងនោះ គឺអ្នកដែលបង្ហោះនោះ មានចេតនាបរិហារកេរ្តិ៍បង្អួចកិត្តិយសនាង និងក្រុមគ្រួសារ។
នៅចុងបញ្ចប់នៃកិច្ចប្រជុំនេះ ទាំងសាមីខ្លួននៅលើរូបថតទាំង២ មន្ត្រីសង្ឃសុទ្ធតែបានអះអាងថា រូបថតរបស់ ភិក្ខុ វ៉ាន វន្លឺ ដេកឱបកញ្ញា លប ធីតា ដែលគេបង្ហោះនៅលើហ្វេសប៊ុកនោះ សុទ្ធជារូបភាពកាត់ត គ្មានការពិតឡើយ ៕
