កំពង់ឆ្នាំង ៖ រសៀលថ្ងៃទី២៥ ខែមិថុនា ឆ្នាំ២០១៩ វេជ្ជបណ្ឌិតម្នាក់នៅមន្ទីរពេទ្យបង្អែកខេត្តកំពង់ឆ្នាំង ត្រូវនគរបាលតាមចាប់ខ្លួន ក្រោយរងការចោទថា បានប៉ងចាប់រំលោភអ្នកគ្រូពេទ្យម្នាក់ នៅក្នុងបន្ទប់ទឹក កាលពីយប់ថ្ងៃទី២៣ ខែមិថុនា ឆ្នាំ២០១៩ ។
វេជ្ជបណ្ឌិតត្រូវបានឃាត់ខ្លួន ឈ្មោះ ហេង សេងហ៊ ជាគ្រូពេទ្យ ផ្នែកពិគ្រោះជំងឺដំបូង នៅក្នុងមន្ទីរបង្អែកខេត្តកំពង់ឆ្នាំង ( គាត់មាន គ្លីនិកឯកជនមួយ នៅក្នុងភូមិត្រពាំងចឹក្សា សង្កាត់កំពង់ឆ្នាំង ក្រុងកំពង់ឆ្នាំង តាមផ្លូវជាតិលេខ ៥ ដែលមានជំនាញឯកទេសផ្នែកត្រចៀក ច្រមុះ បំពង់ក មនុស្សចាស់ និងកុមារ ) ។
លោកឧត្តមសេនីយ៍ទោ ខូវ លី ស្នងការនគរបាលខេត្តកំពង់ឆ្នាំង បានថ្លែងប្រាប់នៅថ្ងៃទី២៦ ខែមិថុនា ឆ្នាំ២០១០៩ នេះថា កម្លាំងនគរបាលរបស់លោកពិតជាបានឃាត់ខ្លួនវេជ្ជបណ្ឌិតនោះប្រាកដមែន ក្រោយពីមានពាក្យបណ្តឹងពីនារីរងគ្រោះ ដែលជាគ្រូពេទ្យដូចគ្នាថា បានចាប់រំលោភនាងតែមិនបានសម្រេច ។
បើតាមពាក្យបណ្តឹងរបស់បុគ្គលិកពេទ្យជាស្ត្រីរូបនោះ បានប្ដឹងទៅស្នងការខេត្ត ដោយបានចោទប្រកាន់ថា គ្រូពេទ្យនោះថា បានប៉ុនប៉ងចាប់រំលោភលើរូបនាងនៅក្នុងបន្ទប់ទឹកតែមិនបានសម្រេច កាលពីវេលាយប់ថ្ងៃទី២៣ ខែមិថុនា ឆ្នាំ២០១៩ ខណៈនាងបានចូលក្នុងបន្ទប់ទឹកនាពេលយប់នោះ ហើយត្រូវវេជ្ជបណ្ឌិតរូបនោះចូលទៅតាមក្រោយដោយចាប់ឱបនាងពីក្រោយប៉ុនប៉ងផ្តួលនិងរំលោភ ប៉ុន្តែត្រូវបាននាងរើបម្រះរួចហើយរត់ចេញក្រៅសំដៅ ទៅគ្រែដេករបស់នាងនៅក្នុងមន្ទីរពេទ្យ ។ តែលោកគ្រូពេទ្យរូបនោះនៅតែតាមនាងរហូតទៅដល់បន្ទប់ដេកទៀត ដោយចាប់នាងអង្អែលភ្លៅ ធ្វើអោយនាងភ័យហើយរត់ចេញពីបន្ទប់ដេកនោះទៅដេកជាមួយមិត្តភក្កិរបស់នាងដែលជាគ្រូពេទ្យដូចគ្នា ។
សមត្ថកិច្ចបញ្ជាក់ថា នៅម៉ោង៥ល្ងាច ថ្ងៃទី២៥មិថុនា សមត្ថកិច្ចកំពុងតែប្រមូលភស្តុតាងទាក់ទងនឹងរឿងហេតុ និងកំពុងតែត្រួតពិនិត្យទៅលើកាមេរ៉ាសុវត្ថិភាពនៅក្នុងមន្ទីរពេទ្យផ្ទាល់តែម្ដង ។ ក្រោយពិនិត្យមើល កាមេរ៉ាសុវត្ថិភាពក្នុងមន្ទីរពេទ្យ បានឃើញនូវសកម្មភាពខាងលើនេះ ពិតជាកើតមានពិតមែន ។
ទាក់ទងក្នុងរឿងនេះ ជនសង្ស័យជាវេជ្ជបណ្ឌិតរូបនេះ បានទួលស្គាល់ថា ខ្លួនពិតជាបានប្រព្រឹត្តទៅលើគ្រូពេទ្យក្រមុំនោះពិតមែន គឺគ្រាន់តែឱបនាងពីក្រោយប៉ុណ្ណោះ ដោយជនសង្ស័យព្រមសងសំណងជំងឺចិត្តទៅជនរងគ្រោះ ចំនួន៨ពាន់ដុល្លារ ដើម្បីបញ្ចប់រឿងក្រៅប្រព័ន្ធតុលាការ ។ ប៉ុន្តែការសម្របសម្រួលក្រៅប្រព័ន្ធតុលាការបែបនេះ ភាគីខាងនារីរងគ្រោះ មិនព្រមទទួលយកឡើយ ដោយទាមទារឲ្យសមត្ថកិច្ចអនុវត្តតាមច្បាប់ទើបនាងសុខចិត្ត ។
បច្ចុប្បន្ន សមត្ថកិច្ចជំនាញ នៃការិយាល័យប្រឆាំងការជួញដូរ និងការពារអនីតិជន នៃស្នងការដ្ឋាននគរបាលខេត្តកំពង់ឆ្នាំង កំពុងតែសួរនាំលោកដុកទ័រ ហេង សេងហ៊រ ដើម្បីកសាងសំណុំរឿងបញ្ជូនទៅតុលាការ តាមច្បាប់ ៕
