កូរ៉េខាងត្បូង ៖ បំពង់ពន្លត់អគ្គិភ័យបច្ចុប្បន្ន វាអាចជួយការពារពីគ្រោះថ្នាក់អគ្គិភ័យចាប់ផ្ដើមដំបូងៗបាន ប៉ុន្តែក៏មានបំពង់ខ្លះមានទម្ងន់រាងធ្ងន់បន្តិចដែលជាហេតុពិបាកលើកបាញ់ពន្លត់ ពិសេសបើស្រីៗទៀត អាចនិយាយថា លើកស្ទើរតែមិនរួចតែម្ដង ថ្មីៗនេះ ប្រទេសកូរ៉េខាងត្បូងបានរករបកគំហើញថ្មីមួយទៀតហើយ ដោយបង្កើតថូផ្កាសម្រាប់ពន្លត់អគ្គីភ័យ ។
លោក Hwang Seong-phil នាយកផ្នែកច្នៃប្រឌិត នៅក្រុមហ៊ុន Cheil Worldwide ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុន Samsung លោកបាននិយាយថា បន្ទាប់ពីអគ្គិភ័យចាប់ផ្ដើមឆេះដំបូងមនុស្សស្ថិតនៅក្នុងភាពភ័យស្លន់ស្លោ ហើយមនុស្សមួយចំនួនធំមិនអាចមានស្មារតីហ្នឹងនររត់ទៅរកកន្លែងដាក់បំពង់ពន្លត់អគ្គីភ័យឡើយ ហេតុនេះ ក្រុមហ៊ុនបានបង្កើតវត្ថុម្យ៉ាងដែលវត្ថុនោះគឺថូពន្លត់អគ្គីភ័យ គ្រាន់តែយើងបោះថូនោះឫចោលវាទៅក្នុងអណ្តាតភ្លើងដែលកំពុងឆាបឆេះនោះវាក៏រលត់ ។
លក្ខណៈច្នៃប្រឌិតថ្មី គឺថូពន្លត់អគ្គីភ័យនេះ មានផ្ទុកសារជាតិកាបូណាតរាវ ដែលអាចទប់ស្កាត់អុកស៊ីសែន ហើយវាមានប្រសិទ្ធភាពក្នុងការទប់ស្កាត់អគ្គីភ័យ នៅពេលដែលថូត្រូវបានបោះចូលទៅក្នុងអណ្តាតភ្លើង វត្ថុរាវដែលមានបរិមាណ 770ml នៅក្នុងថូនោះ ត្រូវបានបែកចេញដើម្បីពន្លត់អគ្គិភ័យ ។ ថូនោះត្រូវបានគេធ្វើឡើងពីប៉ូលីវីលីនក្លរួ (PPC) ដើម្បីកាត់បន្ថយគ្រោះថ្នាក់នៃបំណែកផ្ទៃរបស់ថូ នៅពេលបោះចូលភ្លើង ។ កម្លាំងនៃថូពន្លត់អគ្គីភ័យមួយ គឺស្មើនឹងបំពង់ពន្លត់អគ្គីភ័យមួយបំពុង ។ ទម្ងន់នៃថូ ស្រាលជាងបំពង់ពន្លត់អគ្គីភ័យ ។
អតិថិជនម្នាក់ឈ្មោះ Park Gi-jong វ័យ៦២ឆ្នាំ លោកបាននិយាយថា ដោយសាររូបគាត់ធ្លាប់ភ័យស្លន់ស្លោ នៅពេលមានអគ្គិភ័យមួយកើតឡើង ភ្លាមៗរូបគាត់គិតតែរត់រកទីសុវត្ថិភាព មិនបានគិតរកវិធីពន្លត់ភ្លើងទេ ពោលគឺពិបាកក្នុងការរត់ទៅរកបំពង់ពន្លត់អគ្គីភ័យ ដូច្នេះរូបគាត់បានប្រើថូពន្លត់អគ្គីភ័យនេះ ដែលវាអាចប្រើនៅក្នុងផ្ទះជំនួសថូផ្កាបាន ។ នៅពេលដែលបានប្រើប្រាស់ថូនេះ គាត់មានអារម្មណ៏សុវត្ថិភាពជាងមុន ហើយបើទោះជាមានភ្លើងឆេះ នៅផ្ទះ រឺនៅអគារការិយាល័យរបស់គាត់ក៏ដោយ នៅភ្លើងឆាបឆេះ គឺគាត់គ្រាន់តែបោះថូចូលភ្លើង ជាការស្រេច ៕
