ភ្នំពេញ ៖ មន្ត្រីនគរបាលច្រកទ្វារអន្ដរជាតិក្អមសំណរចំនួន៣នាក់ និងបក្ខពួកម្នាក់ទៀត ដែលពាក់ព័ន្ធនឹង ករណីលាយថ្នាំឲ្យនារីខារ៉ាអូខេផឹក បណ្ដាលឲ្យស្លាប់ និងពុល៣នាក់ទៀត នាពេលកន្លងទៅនោះ ត្រូវបានសាលាដំបូងខេត្តកណ្តាល សម្រេចឃុំខ្លួនជាបណ្តោះអាសន្នហើយ នៅល្ងាចថ្ងៃទី២០ ខែមិថុនា ឆ្នាំ២០១៩នេះ ។
ជនសង្ស័យ៤នាក់ មានទី១ ឈ្មោះ ទឹម វឌ្ឍនៈ អាយុ៣៩ឆ្នាំ, ទី២ ឈ្មោះ ចន្ត្រា វណ្ណៈ អាយុ៣៥ឆ្នាំ, ទី៣ ឈ្មោះ កែវ វឌ្ឍនៈពូន អាយុ២៧ឆ្នាំ អ្នកទាំង៣ជានគរបាលច្រកទា្វអន្តរជាតិក្អមសំណរ និងទី៤ ឈ្មោះ វ៉ាន់ ជីវ័ន្ត អាយុ២៩ឆ្នាំ មុខរបរកម្មករ ។ ជនសង្ស័យម្នាក់ទៀតកំពុងរត់គេចខ្លួន ។
លោក ឯក ស៊ុនរស្មី ព្រះរាជអាជ្ញារងបានសម្រេចធ្វើការចោទប្រកាន់ ជនសង្ស័យ ទឹម វឌ្ឍនៈ ពីបទ «ចាត់ចែងឱ្យប្រើប្រាស់ដោយខុសច្បាប់នូវសារធាតុញៀន» និងចំណែក ឯ៣រូបផ្សេងទៀត ត្រូវបានចោទពីបទ «ប្រើប្រាស់ដោយខុសច្បាប់នូវសារធាតុញៀន(ករណីមិនរាងចាល)» នៃច្បាប់ស្តីពីការត្រួតពិនិត្យគ្រឿងញៀន ។ សំណុំរឿងបានបញ្ជូនទៅលោកស្រី ពេជ មារ៉ែន ចៅក្រមស៊ើបសួរសាលាដំបូងខេត្តកណ្តាល សម្រេចចេញដីកាឃុំខ្លួនដាក់ពន្ធនាគារបណ្តោះអាសន្ន ។
យោងតាមមាត្រា៤២ នៃច្បាប់ស្តីពីការត្រួតពិនិត្យគ្រឿងញៀន បទ «ចាត់ចែងឱ្យប្រើប្រាស់ដោយខុសច្បាប់នូវសារធាតុញៀន» កថាខណ្ឌទី៤ បានចែងថា ត្រូវផ្តន្ទាទោសឱ្យជាប់ពន្ធនាគារពី១០ ទៅ២០ឆ្នាំ និងពិន័យប្រាក់ពី២០លានរៀល ទៅ៤០លានរៀល ក្នុងករណីដែលការប្រព្រឹត្តល្មើស បានបណ្តាលឱ្យស្លាប់មនុស្ស ។
បើតាមរបាយការណ៍សមត្ថកិច្ច បានបង្ហាញថា នៅថ្ងៃទី១៦ ខែមិថុនា ឆ្នាំ២០១៩ វេលាម៉ោង០១ និង៣០នាទីយប់ ជនសង្ស័យទាំង៥នាក់(ម្នាក់កំពុងរត់គេចខ្លួន) បានចូលទៅច្រៀងខារ៉ាអូខេ នៅហាង ម៉ីម៉ី បន្ទប់លេខ៧៧៧៧ នៅភូមិក្អមសំណក្រោម ឃុំក្អមសំណ ស្រុកលើកដែក ខេត្តកណ្តាល ដោយមានស្រីកំដរចំនួន០៤នាក់ (ជនរងគ្រោះម្នាក់ស្លាប់) លុះផឹកស៊ីច្រៀងរាំបានប្រហែលជាកន្លះម៉ោង ឈ្មោះ ទឹម វឌ្ឍនៈ បានយកថ្នាំ ចំនួន០២ដប ទំហំប៉ុនម្រាមដៃមកលាយជាមួយភេសជ្ជៈគោជល់(ប្រភេទអ៊ិចស្តារស៊ី និងប្រភេទថ្នាំគ្រវីមានសារធាតុញៀនជាច្រើនមុខ) និងក្នុងស្រា ហើយលាយគ្នារួចឲ្យគ្នីគ្នាចាក់ចូលកែវតូចឲ្យ ស្រីកំដររៀងៗខ្លួនផឹក ដោយប្រើហិង្សាបង្ខំឲ្យផឹកចំនួនបីកែវជាប់គ្នា ។ លុះបានជា៥ទៅ៦នាទី ក៏មានអាការៈធ្វើទុក្ខរហូតធ្វើឲ្យស្លាប់នារីម្នាក់ និងឈឺធ្ងន់ស្រាលចំនួន៣នាក់ ហើយដឹងដល់ម្ចាស់ហាង ក៏បានរាយការណ៍មកសមត្ថកិច្ច សមត្ថកិច្ចបានចុះទៅឃាត់ខ្លួនបានជនសង្ស័យ០៤នាក់ បញ្ជូនមកអធិការដ្ឋាន នគរបាលស្រុកដើម្បីកសាងសំណុំរឿង និងបញ្ជូនតាមនីតិវិធី ៕