ភ្នំពេញ ៖ នៅថ្ងៃទី១៧ មិថុនា ក្រុមប្រឹក្សាវិន័យរបស់សហព័ន្ធប្រដាល់គុនខ្មែរ ដែលមានលោកឧត្តមសេនីយ៍ វ៉ា ស៊ិនភិរម្យ ជាប្រធាន បានចេញលិខិតដាក់ទណ្ឌកម្មចៅក្រម៣រូប ក្នុងម្នាក់ៗទទួលពិន័យ៦សប្ដាហ៍ ដោយសារតែធ្វេសប្រហែស ផ្ដល់ពិន្ទុធ្វេសប្រហែស ជាហេតុធ្វើឲ្យមានភាពមិនយុត្តិធម៌ដល់កីឡាករ ។
ចៅក្រមដែលទទួលទណ្ឌកម្ម គឺចៅក្រម ម៉ង់ ស៊ីថង, ចៅក្រម រាម កុសល និងចៅក្រម ឡុង សាលវ័ន្ដ ។
លោកប្រមុខសហព័ន្ធប្រដាល់គុនខ្មែរ បានបន្ទោសថា ពួកគេទើប តែបញ្ចប់វគ្គបំប៉នថ្មីៗ គឺថ្ងៃទី១២-១៣មិថុនា នេះសោះ បែរជាពួកគេ ធ្វើការដោយធ្វេសប្រហែសបែបនេះទៅវិញ ? សហព័ន្ធនៅមិនទាន់ឈាន់ដល់ចោទប្រកាន់ពួកគេទៅ លើរឿងផលប្រយោជន៍ទេ គ្រាន់តែបោទ ពីបទធ្វេសប្រហែសក្នុងការផ្ដល់ពិន្ទុ តែប៉ុណ្ណោះ ។
ទណ្ឌកម្ម៦សប្ដាហ៍របស់សហព័ន្ធ ប្រការទី១ បានសម្រេចដាក់ពិន័យចៅក្រមទាំង៣រូប ដោយព្យួរការងារជាមន្ត្រីចៅក្រមបណ្ដោះអាសន្ន ដើម្បីសិក្សារៀនសូត្របន្ថែម រយៈពេល៦សប្ដាហ៍ ដោយគិតចាប់ពីថ្ងៃទី១៦ មិថុនា តទៅ ។ និងប្រការ ២ បានចែងថា ចៅក្រមទាំង៣រូប ត្រូវទទួលស្គាល់កំហុសរបស់ខ្លួន និងខិតខំរៀនសូត្រ អនុវត្តន៍ឲ្យបាន ល្អនូវលក្ខន្តិកៈ បទបញ្ជាផ្ទៃក្នុង បទបញ្ជាគ្រប់គ្រងការប្រកួត និងបទបញ្ជាបច្ចេកទេស នៃការផ្ដល់ពិន្ទុរបស់សហព័ន្ធកីឡាប្រដាល់គុនខ្មែរ ។
សូមជម្រាប់ថា ការប្រកួតធ្វើឡើងនៅរសៀលថ្ងៃទី១៥ មិថុនា ២០១៩ អ្នកប្រដាល់កម្ពុជា ឃីម បូរ៉ា មកពីក្លិបរស្មីភូមិគាបខេត្តបន្ទាយមានជ័យ ប្រកួតជាមួយអ្នកប្រដាល់ថៃ ទួន ប៉េ (Toun Pe) ។ លទ្ធផលនៃការប្រកួតផ្លូវការដែលចៅក្រមផ្ដល់ឲ្យនោះ គឺចៅក្រម៣រូប ផ្ដល់ពិន្ទុឲ្យ ទួន ប៉េ ឈ្នះ(លោកម៉ង់ ស៊ីថន លោកឡុង សាលវ័ន្ដ និងលោករាម កុសល) និង២រូប ផ្ដល់ពិន្ទុឲ្យឃីម បូរ៉ាឈ្នះ (លោកទេស សារិន និងលោកម៉ាត់ សារ៉ន ) ។
បន្ទាប់ពីការប្រកួតភ្លាមៗ កីឡាករ ឃុន ឌីម៉ា ដែលជាបងប្រុសបង្កើតរបស់ បូរ៉ា បានធ្វើការតវ៉ាភ្លាមៗ ហើយនៅ ថ្ងៃទី១៦ មិថុនា ក្រុមអ្នកជំនាញសហព័ន្ធរួមជាមួយក្រុមប្រឹក្សាវិន័យ ដោយមានការចូលរួមពីលោក តែម ម៉ឺន ប្រមុខប្រដាល់គុនខ្មែរផងនោះ បានចាក់វីដេអូ ប្រកួតនេះមើលឡើងវិញ មួយទឹកម្ដងៗ ដោយប្រុងប្រយ័ត្នជាទី
បំផុត ។ ជាមួយនឹងការត្រួតពិនិត្យឡើងវិញនេះ គេសង្កេតឃើញថា នៅទឹកទី១ និងទឹកទី២ បូរ៉ាឈ្នះ ទឹកទី៣ បូរ៉ាចាញ់ ទឹកទី៤ បូរ៉ាឈ្នះ និងវ៉ៃ ទួន ប៉េ ឲ្យអាជ្ញាកណ្ដាលរាប់៨ ថែមទៀតផង ទឹកទី៥បូរ៉ាចាញ់ ។ សរុបមក ពិតប្រាកដគឺអ្នកប្រដាល់កម្ពុជា ឃីម បូរ៉ា ឈ្នះ ទួន ប៉េ ក្នុងលទ្ធផល៣ទល់២ ។
មតិរបស់ក្រុមអ្នកស្នេហាវិស័យកីឡាប្រដាល់ខ្មែរ ដែលទស្សនាផ្ទាល់បានអោយដឹងថា មិនគួរណាចៅក្រមប្រដាល់ខ្មែរទាំង៣រូបនៅសង្វៀន CNC ដាក់ពិន្ទុបែបហ្នឹងសោះ ? ម្នាក់ៗសុទ្ធតែចៅក្រមជើងចាស់ ហើយទើបតែសិក្សាបញ្ចប់វគ្គបំប៉នថ្មីៗនេះទៀតផង ៕
សូមទស្សនាវីដេអូឃ្លីប ៖