បាត់ដំបង ៖ មានករណីអគ្គិភ័យកំពុងឆាបឆេះយ៉ាងសន្ធរសន្ធៅ ដែលត្រូវបានលេបត្របាក់ផ្ទះប្រជាពលរដ្ឋ៣ខ្នង បង្កឱ្យមានការភ្ញាក់ផ្អើលកាលពីវេលាម៉ោង៤និង១០នាទីល្ងាច ថ្ងៃទី១៨ ខែមិថុនា ឆ្នាំ២០១៩ ស្ថិតក្នុងភូមិកម្មករ សង្កាត់ស្វាយប៉ោ ក្រុងបាត់ដំបង ខេត្តបាត់ដំបង ។
ចំពោះករណីនេះប្រជាពលរដ្ឋបានឲ្យដឹងថា អគ្គិភ័យខាងលើផ្តើមចេញពីម្ចាស់ផ្ទះទី១-ឈ្មោះ សាំង តាគន ភេទស្រី អាយុប្រហែល៧០ឆ្នាំ រួចរាលដាលដល់ម្ចាស់ទី២-ឈ្មោះ យស់ សារិទ្ធ ភេទប្រុស អាយុប្រហែល៦០ឆ្នាំ និងទី៣-ឈ្មោះ អ៊ាម សារួម ភេទស្រី អាយុប្រហែល៧០ឆ្នាំ ហើយផ្ទះទាំង៣ខ្នងនេះ ខាងលើធ្វើអំពីឈើប្រក់ស័ង្កសី ក្រោមធ្វើអំពីថ្ម ។
ពាក់ព័ន្ធនឹងករណីអគ្គិភ័យខាងលើនេះ គឺផ្តើមចេញពីផ្ទះទី១ ឆាបឆេះខ្លួន រួចក៏បន្តរហូតដល់ផ្ទះទី២ និងទី៣តែម្តង ចំពោះមូលហេតុនៃការឆាបឆេះនេះនៅមិនទាន់ដឹងនៅឡើយទេ ហើយខណៈពេលសមត្ថកិច្ចកំពុងតែជួយអន្តរាគមន៍នៅកន្លែងកើតហេតុហើយ ។
បច្ចុប្បន្ននេះរថយន្តពន្លត់អគ្គិភ័យចំនួន៣គ្រឿងបានទៅដល់កន្លែងកើតហេតុខាងលើ កំពុងតែអន្តរាគមន៍ជួយបាញ់ពន្លត់ ប៉ុន្តែមិនទាន់គ្រប់គ្រងស្ថានការណ៍បាននោះទេ ខណៈភ្លើងនៅតែឆាបឆេះយ៉ាងខ្លាំងនៅឡើយ ហើយចំពោះផ្ទះទាំង៣ខ្នងនេះគឺរងការខូចខាតទាំងស្រុង។