ភ្នំពេញ ៖ ថ្ងៃទី១៧ ខែមិថុនា ឆ្នាំ២០១៩ ក្រសួងសុខាភិបាល បានចេញលិខិតព្រមានចំពោះលោកវេជ្ជបណ្ឌិត ហម ឡុង ម្ចាស់បន្ទប់ពិគ្រោះព្យាបាលជំងឺឈ្មោះ ហម ឡុង ដែលមានទីតាំងផ្ទះលេខ 9BEo ផ្លូវលេខ១៤០ សង្កាត់មនោរម្យ ខណ្ឌ៧មករា រាជធានីភ្នំពេញ ទៅលើករណីដែលបាន ពិនិត្យ និងព្យាបាលជំងឺគ្រុនឈាម ដែលបានអោយអ្នកជំងឺដេកសម្រាកព្យាបាលចំនួនប្រាំបួនថ្ងៃ ដោយគិតចាប់ពីថ្ងៃទី០៥ មិថុនា ២០១៩ ដល់ថ្ងៃទី១៤ មិថុនា ដែលជាករណីខុសទៅនឹងលិខិតអនុញ្ញាត ដែលឲ្យបើកបន្ទប់ពិគ្រោះព្យាបាលជំងឺទូទៅ ដែលជាប្រភេទសេវាមិនអនុញ្ញាតឲ្យមានគ្រែសម្រាប់អ្នកជំងឺដេកសម្រាកព្យាបាលលើសពី២៤ម៉ោងឡើយ ។
ក្រសួងបញ្ជាក់ថា ប្រសិនកើតមានម្តងទៀត ក្រសួងសុខាភិបាលនឹងបិទបន្ទប់ព្យាបាលជំងឺឈ្មោះ ហម ឡុង ព្រមទាំងលោកវេជ្ជបណ្ឌិត ហម ឡុង ត្រូវទទួលខុសត្រូវចំពោះមុខច្បាប់ជាធរមាន ។
លិខិតព្រមានរបស់ក្រសួងសុខាភិបាលមានដូចខាងក្រោម ៖
សូមជម្រាបផងដែរថា ថ្មីៗនេះមានការចែករំលែកពេញបណ្តាញសង្គមនូវករណីមួយដែលមានបង្កឲ្យមានការភ្ញាក់ផ្អើលជាខ្លាំង ដោយមានបង្ហាញថា ភាគីអ្នកជំងឺបានឈ្លោះប្រកែកគ្នាជាមួយនឹងភាគីគ្រូពេទ្យ មូលហេតុតម្លៃព្យាបាលជំងឺគ្រុនឈាមចំនួន៩ថ្ងៃ អស់ថ្លៃ ៥,២០០ដុល្លារអាមេរិក ។
នៅក្នុងវិដេអូ លោកវេជ្ជបណ្ឌិត បាននិយាយថា កុមារពីរនាក់ ដែលមានជំងឺគ្រុនឈាមធ្ងន់ធ្ងន់ មិនមែនតែម្នាក់ទេ ហើយអាការៈវិញ គឺរហូតដល់ក្អួតឈាមទៀត ពេលដែលឪពុកម្តាយយកមកដល់ពេទ្យ ម្តាយឪពុកបានប្រាប់ថា អស់ប៉ុន្មានឲ្យតែកូនជា! ទើបលោកវេជ្ជបណ្ឌិត បានប្រើប្រាស់ថ្នាំកំពូលៗ ដែលមានតម្លៃថ្លៃៗ និងយកចិត្តទុកដាក់ខ្ពស់ក្នុងការព្យាបាលរហូតដល់ជាសះស្បើយទាំងពីរនាក់ តែដល់ពេលគិតលុយអស់រហូតដល់ទៅ ៥,២០០$ ទើបក្រុមគ្រួសារបែរជាប្រាប់ថា គ្មានលទ្ធភាព ទើបធ្វើឲ្យមានជម្លោះប្រកែកគ្នាឡើង រហូតបង្ហោះវិដេអូក្នុងហ្វេសបុក ។
កំឡុងពេលឈ្លោះគ្នា ក្នុងវិដេអូ ដែលឪពុកកុមារទាំងពីរបានថត ក៏បានឃើញភរិយាវេជ្ជបណ្ឌិតបាននិយាយទៀតថា ជំងឺនេះ បើទៅសាំងហ្គាពួរ ក៏អស់ ២០ទៅ៣០ម៉ឺនដុល្លារដែរ ។
បន្ទាប់ពីភ្ញាក់ផ្អើលនៅល់ើបណ្តាញសង្គម លោកប្រធានមន្ទីរសុខាភិបាលរាជធានីភ្នំពេញ លោក ងី មានហេង បានធ្វើការ Comment នៅក្នុងហ្វេសបុកថា«ក្រសួងសុខាភិបាល និងមន្ទីរសុខាភិបាលរាជធានីភ្នំពេញបានចុះទៅដោះស្រាយរួចរាល់ហើយ កាលពីរសៀលថ្ងៃទី១៤ ខែមិថុនា ២០១៩ ចប់សព្វគ្រប់នៅម៉ោង ប្រមាណ១៥និង៣០ ។ មាតាបិតាក្មេង និងគ្រូពេទ្យបានស្ម័គ្រព្រមព្រៀងគ្នា» ។
តាមរយៈកិច្ចសន្យា បានបង្ហាញថា ក្រោយពីសម្របសម្រួល ខាងគ្លីនិកព្យាបាលជំងឺ ដែលមានវេជ្ជបណ្ឌិតឈ្មោះ ហម ឡុង បានធ្វើការព្រមព្រៀងបង់ថ្លៃព្យាបាលត្រឹមតែ ២,០០០$ ប៉ុណ្ណោះ ដោយមិនមានការប្តឹងផ្តល់គ្នាទេ ៕