ខេត្តព្រះសីហនុ ៖ បន្ទាប់ពីមានការភ្ញាក់ផ្អើលពីរូបភាពទូកទេសចរណ៍១គ្រឿង បានលិច ត្រូវបានចែកចាយពេញបណ្ដាញសង្គមហ្វេសប៊ុក ស្ថិតក្នុងទីតាំងកំពង់ផែជិត ម្លប់ជ្រៃប៉ោកី ទល់មុខកាស៊ីណូឃ្វីនកូ សង្កាត់០៣ ក្រុង-ខេត្តព្រះសីហនុរួចមក នៅរសៀលថ្ងៃទី១៧ ខែមិថុនា ឆ្នាំ២០១៩នេះ បុគ្គលិកទូកទេសចរណ៍ លិចនៅកំពង់សោម ចេញមុខបកស្រាយការពិតហើយ ។
កញ្ញា នួន ថារី ជាបុគ្គលិកផ្នែកទីផ្សារ នៃក្រុមហ៊ុន«Happy Boat Daily Tour» បានបកស្រាយអោយដឹងថា ការពិតទូកទេសចរណ៍១គ្រឿង គឺលិចមែន លិចតាំងពីយប់ថ្ងៃទី១៦ ខែមិថុនា ឆ្នាំ២០១៩ មកម៉្លេះ ប៉ុន្តែទើបតែមានអ្នកឃើញនៅព្រឹកថ្ងៃទី១៧នេះ ទើបថតបង្ហោះតាមហ្វេសប៊ុក ។
កញ្ញាបញ្ជាក់ថា គ្មានជនរងគ្រោះណាម្នាក់ ហើយក៏គ្មានភ្ញៀវទេសចរណាម្នាក់ ស្ថិត ក្នុងហេតុការណ៍នេះឡើយ ព្រោះទូកនេះបានបញ្ចប់ដណើរកម្សាន្ត មកដល់ផែវិញនៅម៉ោង៦ល្ងាច ថ្ងៃទី១៦ ខែមិថុនា ឆ្នាំ២០១៩ ហើយពេលលិចគឺនៅម៉ោង៨យប់ មានតែបុគ្គលិកពីរបីនាក់ ព្រមទាំងអ្នកបើកទូកម្នាក់ប៉ុនណោះ ។ រូបភាពដែលបានឃើញមានកៅអី និងអីវ៉ាន់មួយចំនួនលើទូក គឺគ្រាន់តែរំដោះចេញដើម្បីសម្រាលទម្ងន់លើទូក ងាយស្រួលបូមទឹកចេញប៉ុនណោះ ហើយពេលទូកលិចនោះ គឺវាមកដល់មាត់ច្រាំងទៅហើយដែរ ។
លោកឧត្តមសេនីយ៍ត្រី ណុប បញ្ញា ស្នងការរងនគរបាលខេត្តព្រះសីហនុ ប្រាប់អោយដឹងថា ហេតុការណ៍ទូកទេសចរណ៍ មួយគ្រឿង ដែលលិចនេះ កើតឡើងដោយសារលក្ខណៈបច្ចេកទេសទូក បូកនឹងពេលមានរលកខ្លាំង ដោយសារតែរដូវនេះជារដូវវស្សា សំបូរភ្លៀង ខ្យល់ និងរលកធំៗ និងថា ករណីនេះ ក្រៅពីខូចខាតទ្រព្យសម្បត្តិខ្លះ មិនមានប៉ះពាល់ដល់អាយុជីវិតមនុស្សឡើយ ។
ទោះជាយ៉ាងនេះក្តី អាជ្ញាធរខេត្តព្រះសីហនុ បានអំពាវនាវអោយអ្នកធ្វើដំណើរតាមផ្លូវសមុទ្រ ពិសេសទូកទេសចរណ៏ និងទូកនេសាទ បង្កើនការប្រុងប្រយត្ន័ ក្នុងករណីធាតុអាកាសមិនល្អ សូមកុំចេញដំណើរ ៕