កាលពីថ្ងៃទី១៦ មិថុនា ២០១៩ ប្រជាជនហុងកុងប្រហែល២លាននាក់ បានបន្ដធ្វើបាតុកម្មយ៉ាងកក្រើក នៅទីក្រុងហុងកុង ដើម្បីប្រឆាំងនឹងការធ្វើច្បាប់បត្យាប័ន ខណៈមេដឹកនាំនៃដែនដីកោះមួយនេះគឺលោកស្រី ការី ឡាំ បានថ្លែងការណ៍សុំទោសជាសាធារណៈ ចំពោះកំហុសឆ្គងដែល«បាននាំដល់ទំនាស់និងជម្លោះជាច្រើន» ព្រមទាំង«ធ្វើឲ្យពលរដ្ឋហុងកុងជាច្រើនមិនសប្បាយនិងខកចិត្ត» ប៉ុន្តែលោកស្រីច្រានចោលការចុះចេញពីតំណែងតាមការទាមទាររបស់ក្រុមបាតុករ ។
បាតុករកាន់តែច្រើនឡើង បាននាំគ្នាដង្ហែក្បួនបាតុកម្មទាមទារឲ្យមេដឹកនាំហុងកុង លោកស្រី Carrie Lam លុបចោលនូវសេចក្ដីព្រាងច្បាប់ធ្វើបត្យាប័ន បញ្ជូនមនុស្សពីដែនដីកោះហុងកុងទៅកាន់ចិនដីគោក និងទាមទារឲ្យលោកស្រីចុះចេញពីតំណែង ។ បាតុកម្មនេះ មានមនុស្សចូលរួមច្រើនជាងគេបំផុត នៅក្នុងប្រវត្តិបាតុកម្ម នៅហុងកុងដែលបានអូសបន្លាយរយៈពេល១សប្តាហ៍មកហើយ។
ពួកអ្នករៀបចំការជួបជុំនេះអះអាងថា មនុស្សប្រមាណ២លាននាក់បានចេញមកសម្តែងការប្រឆាំងជំទាស់របស់គេ ដោយក្រុមបាតុករខ្លះ ធ្វើបាតុកម្មទាំងយប់ ដោយប្រមូលផ្តុំគ្នា អង្គុយស្មឹងស្មាធិ៍ នៅខាងក្រៅអគាររដ្ឋសភា នៃកោះហុងកុង ។ តែប៉ូលិសបានផ្តល់តួលេខប៉ាន់ស្មានទាបជាងឆ្ងាយ គឺមានប្រហែលតែ ៣៣៨,០០០នាក់ ប៉ុណ្ណោះ ។
ពួកបាតុករនៅតែទាមទារឲ្យលោកស្រីចុះចេញពីតំណែង និងលុបចោលច្បាប់ ធ្វើបត្យាប័ន បញ្ជូនមនុស្សពីដែនដីកោះហុងកុងទៅកាន់ចិនដីគោកនេះចោលជារៀងរហូតនិងសុំទោសការដែលប៉ូលិសប្រើឧស្ម័នហៀរទឹកភ្នែក និងបាញ់កាំភ្លើងគ្រាប់ជ័រដាក់បាតុករនៅប៉ុន្មានថ្ងៃមុននេះ ។
រណសិរ្សសិទ្ធិជនស៊ីវិល ដែលបានរៀបចំបាតុកម្មនេះ បានប្រកាសថា ក្រុមបាតុករនឹងបន្តធ្វើបាតុកម្ម រហូតទាល់តែការទាមទាររបស់ពួកគេ បានសម្រេចសមដូចបំណងប្រាថ្នា ៕
