ខេត្តស្វាយរៀង ៖ នៅម៉ោង៨យប់ ថ្ងៃទី១៣ ខែមិថុនា ឆ្នាំ២០១៩ សមត្ថកិច្ចនគរបាលវរការពារព្រំដែនលេខ៦១១ ប្រចាំការនៅប៉ុស្តិ៍ច្រករបៀងធ្លក បង្ក្រាបបទល្មើសចាប់បានគ្រឿងញៀន១៧គីឡូក្រាម ប៉ុន្តែគួរឲ្យសោកស្តាយ ជនសង្ស័យបានរត់គេចខ្លួនបាត់ នៅចំណុចវាលស្រែជិតបង្គោលព្រំដែន ស្ថិតក្នុងភូមិធ្លក សង្កាត់ច្រកម្ទេស ក្រុងបាវិត ។
នៅព្រឹកថ្ងៃទី១៤ មិថុនា នេះ កម្លាំងជំនាញកំពុងសហការជាមួយភាគីវៀតណាម ដើម្បីស្រាវជ្រាវរកមុខសញ្ញាពាក់ព័ន្ធ និងចាប់ខ្លួនមកផ្តន្ទាទោសតាមច្បាប់ ។
ទាក់ទិនករណីខាងលើនេះដែរ សមត្ថកិច្ចបានបង្ហើបឲ្យដឹងថា មុនពេលកើតហេតុកម្លាំងប៉ុស្តិ៍នគរបាលការពារព្រំដែនច្រករបៀងធ្លកនៃវរសេនាតូចនគរបាលការពារព្រំដែនលេខ៦១១ បានចេញល្បាតតាមខ្សែក្រវ៉ាត់ព្រំដែនត្រង់ចំណុចបង្គោលព្រំដែនលេខ១៧០/៥ ស្លាបខាងឆ្វេងច្រកទ្វាព្រំដែនអន្តរជាតិបាវិតបានជួបជនសង្ស័យម្នាក់ ភេទប្រុស (មិនស្គាល់អត្តសញ្ញាណ)ដើរកាត់វាលស្រែក្បែរចំការប្រេងខ្យល់ ដោយមានយួរវ៉ាលីធំមួយ ពណ៌ខ្មៅ ដោយមានការសង្ស័យសមត្ថកិច្ចយើងបានហៅអោយឈប់ ដើម្បីសួរនាំ ប៉ុន្តែជនសង្ស័យបានទម្លាក់វ៉ាលីទុកចោលនៅលើដី ហើយបានរត់គេចខ្លួនចូលទៅក្នុងព្រៃចំការប្រេងខ្យល់ ហើយកម្លាំងសមត្ថកិច្ចយើងបានដេញតាមរុករក តែរកមិនឃើញដោយសារយប់ងងឹត ។
ប្រភពដ៏ដែលបន្តទៀតថា ក្រោយមកសមត្ថកិច្ចបានយកវ៉ាលីមកប៉ុស្តិ៍ ដើម្បីធ្វើការត្រួតពិនិត្យឆែកឆេរវ៉ាលីដែលជនសង្ស័យទម្លាក់ចោល គឺឃើញមានម្សៅក្រាម ពណ៌ស ថ្លាសង្ស័យជាថ្នាំញៀន (ប្រភេទមេតំហ្វេតាមីន) ចំនួន១៧ដុំ ទម្ងន់១៧គីឡូក្រាម (គិតទាំងសំបកវេចខ្ចប់) ។ សមត្ថកិច្ចក៏បានរាយការណ៍ជូនលោកស្នងការនៃស្នងការដ្ឋាននគបាលខេត្ត ដើម្បីចាត់ការតាមនីតិវិធី ។
បច្ចុប្បន្ន វត្ថុតាងគ្រឿងញៀនទម្ងន់១៧គីឡូក្រាម កំពុងត្រូវរក្សាទុកនៅប៉ុស្តិ៍ព្រំដែនធ្លក ដើម្បីរៀបចំតាមនីតិវិធី នាំយកទៅកាន់ស្នងការដ្ឋាននគរបាលខេត្តស្វាយរៀង នគរបាលការពារព្រំដែន បង្ក្រាបគ្រឿងញៀន១៧គីឡូ ជនសង្ស័យ រត់គេចខ្លួន៕
