រាជធានីភ្នំពេញ ៖ បទល្មើសឆក់មិនបានស្ងប់ស្ងាត់ឡើយ កើតមានករណីឆក់ស្ទើររាល់ថ្ងៃ ជាក់ស្ដែងនៅថ្ងៃម្សិលមិញនេះ មន្ត្រីអាវុធហត្ថលើផ្ទៃប្រទេសម្នាក់ កំពុងតែដើរឆ្លងផ្លូវ សំដៅទៅរថយន្តខ្លួន ស្រាប់តែក្រុមចោរបានឆក់កាបូបយកអស់លុយប្រមាណ៣,០០០ដុល្លារ និងកាំភ្លើងខ្លី១ដើម ផងដែរ ។
ហេតុការណ៍នេះបានកើតឡើងកាលពីវេលាម៉ោងប្រមាណ០៤ ល្ងាចថ្ងៃទី១២ ខែមិថុនា ឆ្នាំ២០១៩ ស្ថិតនៅជិតរង្វង់មូលកាំកូស៊ីធី ខណ្ឌទួលគោក រាជធានីភ្នំពេញ ។
បើតាមរយៈកាមេរ៉ាសុវត្ថិភាពបានបង្ហាញឲ្យឃើញថា មុនពេលកើតហេតុគេឃើញជនរងគ្រោះបានដើរឆ្លងថ្នល់សំដៅទៅរករថយន្ត ដែលកំពុងតែឈប់ចាំនៅផ្លូវម្ខាងទៀត។ ខណៈឆ្លងថ្នល់បានពាក់កណ្តាលផ្លូវ ស្រាប់តែមានជនសង្ស័យមានគ្នា២នាក់ជិះម៉ូតូមួយគ្រឿងមកជិត រួចក៏ធ្វើសកម្មភាពឆក់កាបូបដៃយកទៅតែម្តង ក្រុមចោរ អាចមានបក្ខពួក២ម៉ូតូ ទៅ៣ម៉ូតូ ដើម្បីបិទគូទពីក្រោយ ។ តាមការបញ្ជាក់ពីជនរងបានឲ្យដឹងថា នៅក្នុងកាបូបនោះមានប្រាក់ចំនួន ៣,០០០ដុល្លារ និងកាំភ្លើងខ្លីមួយដើមផងដែរ ។
ក្រោយកើតហេតុ្ ជនរងគ្រោះដែលគេដឹងថា ជាមន្ត្រីអាវុធហត្ថនៅការិយាល័យព្រហ្មទណ្ឌ បានដាក់ពាក្យប្តឹង ដើម្បីតាមស្រាវជ្រាវចាប់ក្រុមចោរខាងលើ យកមកផ្តន្ទាទោសតាមផ្លូវច្បាប់ ៕
