ភ្នំពេញ ៖ នៅរសៀលថ្ងៃទី១៣ មិថុនា ២០១៩នេះ លោក គុជ គឹមឡុង តំណាងអយ្យការអមសាលាដំបូងរាជធានីភ្នំពេញ សម្រេចការចោទប្រកាន់អ្នកដែលពាក់ព័ន្ធករណីគ្រឿងញៀន នៅក្នុងក្លឹបកម្សាន្ដ «លុច្សសារី» តាមមាត្រា៤០ មាត្រា៤២ និងមាត្រា៤៤ នៃច្បាប់ស្តីពីការគ្រប់គ្រងគ្រឿងញៀន និងមាត្រា២៩ នៃក្រមព្រហ្មទណ្ឌ ហើយបញ្ជូនជនល្មើសនិងសំណុំរឿងទៅចៅក្រមស៊ើបសួរដើម្បីចាត់ការបន្តតាមនីតិវិធី ។
បទល្មើសដែលត្រូវចោទ ៖ មេការជនជាតិវៀតណាម និងខ្មែរម្នាក់ ជាប់ចោទពីបទ ផ្ដល់ទីតាំងឲ្យប្រព្រឹត្តបទល្មើសគ្រឿងញៀន, ក្រុមសន្ដិសុខពីបទ សម្របសម្រួលបង្កលក្ខណៈឲ្យប្រព្រឹត្តបទល្មើស គ្រឿងញៀន និងក្រុមអ្នកបម្រើសេវាក្នុងក្លឹប ពីបទ ផ្សំគំនិតឲ្យប្រព្រឹត្តបទល្មើសគ្រឿងញៀន ។
ក្រុមអ្នកពាក់ព័ន្ធដែលត្រូវបានបញ្ជូនទៅតុលាការ ទាំង១៧នាក់ មានជនជាតិវៀតណាម៥នាក់ និងជនជាតិខ្មែរ១២នាក់ ។
សូមរម្លឹកថា ប្រតិបត្តិការចុះឆែកឆេរក្លឹបកម្សាន្ត «លុច្សសារី» បានធ្វើឡើងនៅវេលាម៉ោង៤៖០០រំលងអាធ្រាត្រឈានចូលថ្ងៃទី០៨ ខែមិថុនា ឆ្នាំ២០១៩ ស្ថិតនៅតាមបណ្ដោយផ្លូវលេខ២១៤ កែងផ្លូវ៦៣ សង្កាត់បឹងរាំង ខណ្ឌដូនពេញ ។ ក្រោយការឆែកឆេរកម្លាំងសមត្ថកិច្ចបានបិទក្លឹបជាបណ្តោះអាសន្ន និងបាននាំអ្នកលេងកម្សាន្តប្រមាណ ៤០០នាក់ទៅស្នងការដ្ឋាននគរបាលរាជធានីភ្នំពេញ ។ ក្នុងប្រតិបត្តិការនោះដែរ សមត្ថកិច្ចក៏បានឃាត់ជនបរទេស៣១នាក់ផ្សេងទៀត ប៉ុន្តែពួកគេត្រូវបានបញ្ជូនទៅអគ្គនាយកដ្ឋានបរទេស។ ក្រៅពីនោះជនដទៃទៀត ដែលសេពគ្រឿងញៀន គឺត្រូវបានបញ្ជូនទៅមណ្ឌលអប់រំបន្សាបគ្រឿងញៀន ៕