អបអរសាទរ! ក្រុមបាល់ទាត់ជម្រើសជាតិកម្ពុជា បានឡើងទៅជុំទី២ នៃពានរង្វាន់បាល់ទាត់ពិភពលោកឆ្នាំ២០២២ នៅប្រទេសកាតា (FIFA World Cup 2022) ជាផ្លូវការហើយ បន្ទាប់ពីបន្ដយកឈ្នះក្រុមជម្រើសជាតិប៉ាគីស្ថាន ដោយលទ្ធផល ២-១ ក្នុងជំនួបជើងទី២ នៅទីក្រុងដូហា ប្រទេសកតា នារាត្រីថ្ងៃទី១១ ឈានចូលថ្ងៃទី១២ ខែមិថុនា ឆ្នាំ២០១៩ ។
សរុបលទ្ធផល ទំង២ជើង ក្រុមជម្រើសជាតិកម្ពុជា បានយកឈ្នះក្រុមប៉ាគីស្ថាន ៤-១ កាលពីជើងទី១ កម្ពុជា បានយកឈ្នះប៉ាគីស្ថាន ២-០ ក្នុងដីម្ដងរួចមកហើយ ។
វគ្គជម្រុះបឋមនៅតំបន់អាស៊ី នៃ FIFA World Cup 2022 បានរកឃើញក្រុមដែលឡើងបន្តទៅវគ្គជម្រុះជុំទី២ (ចែកពូល) ទាំង៦ក្រុមហើយ ដែលក្នុងនោះមានក្រុមអាស៊ានតែ២ប៉ុណ្ណោះ ខណៈក្រុមអាស៊ាន ៣ទៀត បានធ្លាក់ហើយ។
ក្រុមមកពីតំបន់អាស៊ានទាំង ២ ដែលឆ្លងផុតទៅជុំបន្ទាប់ គឺ កម្ពុជា និងម៉ាឡេស៊ី ចំណែកក្រុម ៣ ដែលធ្លាក់ រួមមាន ឡាវ ប្រ៊ុយណេ និងទីម័រខាងកើត។
ក្នុងការប្រកួតជុំទី២ មានក្រុមទាំងអស់ ៤០ ដោយត្រូវបែងចែកជា ៨ពូល ក្នុង១ពូល មាន ៥ក្រុម ដោយធ្វើឡើងតាមរូបមន្តប្ដូរទឹកដី ដោយក្រុមទាំងអស់ក្នុងពូលជាមួយគ្នា ត្រូវប៉ះគ្នា២ជើង (ក្នុងដី ក្រៅដី)។ ការចាប់ឆ្នោតជ្រើសរើសពូល នឹងធ្វើឡើងនៅថ្ងៃទី១៧ ខែកក្កដា ឆ្នាំ២០១៩ នៅទីក្រុងដូហា ប្រទេសកាតា ដែលជាប្រទេសម្ចាស់ផ្ទះរៀបចំការប្រកួត FIFA World Cup 2022 ៕
